Марафонцы з Кіраўшчыны — у Магілёве і Мінску
У мінулую нядзелю ў Магілёве адбылася асаблівая падзея: упершыню ў абласным цэнтры прайшоў “Мебелайн марафон”, прыняць удзел у якім мог любы жадаючы. Сярод такіх аказаліся і жыхары нашага раёна. Гэта прыхільнікі фізкультурнага руху і здаровага ладу жыцця, пастаянныя ўдзельнікі раённых (і не толькі) спаборніцтваў з ААТ “Рассвет імя К.П.Арлоўскага” Яўген Пішчалін разам з сям’ёй, а таксама Андрэй Бяляўскі. Мы папрасілі Яўгена Пішчаліна падзяліцца ўражаннямі ад адметнага спартыўнага мерапрыемства:
— Галоўнае, на што разлічвалі арганізатары марафона — Магілёўскія абласны і гарадскі выканаўчыя камітэты, а таксама галоўны спонсар — літоўска-магілёўская кампанія “Мебелайн” — гэта масавасць удзельнікаў. І ў гэтым плане спадзяванні збыліся. На спаборніцтвы заявілася больш 3 тысяч аматараў лёгкай атлетыкі — не толькі з розных куткоў Прыдняпроўскага краю, але і з іншых абласцей Беларусі і нават з замежжа. На старт выйшлі прадстаўнікі самых розных прафесій, роду заняткаў і ўзросту. Самай юнай удзельніцы споўнілася 10 гадоў, самаму сталаму — 81.
Удзельнікам было прапанавана тры дыстанцыі. Першая — марафонская: 42 км 195 м. , на якую адважыліся толькі 67 чалавек, бо, каб пераадолець яе, патрэбна грунтоўная спартыўная падрыхтоўка. Дарэчы, абсалютнымі пераможцамі тут стала сямейная пара з Магілёва — сапраўдныя малайцы!
Куды больш масавымі былі дзве наступныя дыстанцыі: на 10 км, у якой, дарэчы, удзельнічалі і мы з Андрэем Бяляўскім, і на 4 км, у якой пазмагаліся мая жонка Вольга і сын Мікіта.
Стартавалі і фінішавалі фізкультурнікі на плошчы Славы, а самі дыстанцыі пралягалі праз цэнтральныя вуліцы Магілёва. Жыхары абласнога цэнтра, безумоўна, заўзята падтрымлівалі ўдзельнікаў забегаў. Апошнія, да слова, падчас пераадольвання трас былі забяспечаны вадой, фруктамі, каб наталіць смагу і крыху падсілкавацца.
Пераможцы і прызёры атрымалі заслужаныя каштоўныя ўзнагароды. А сертыфікаты аб выступленні на “Мебелайн марафоне-2017” і памятныя медалі былі ўручаны ўсім удзельнікам без выключэння.
Наогул хочацца адзначыць высокі арганізацыйны ўзровень спаборніцтваў. Запомнілася прывітанне лёгкаатлетам-аматарам Міхаіла Швяцова, які прымаў удзел у першым чэмпіянаце СССР па марафону, што праходзіў 32 гады таму менавіта ў Магілёве. Тады ў ім удзельнічалі толькі спартсмены. Цяпер жа спаборніцтвы сталі адкрытымі. У межах марафона на плошчы Славы, дзе стартавалі і фінішавалі ўдзельнікі, на працягу ўсіх 6 гадзін, пакуль ішлі забегі, праходзіла канцэртна-забаўляльная праграма, а таксама дзіцячыя лёгкаатлетычныя спаборніцтвы.
Дарэчы, для нас з Андрэем Бяляўскім гэта ўжо не першыя падобныя спаборніцтвы. Месяцам раней мы прымалі ўдзел у традыцыйным Мінскім паўмарафоне, дзе таксама пераадольвалі дыстанцыю ў 10 км. Трэба адзначыць, што тут пазітыўных уражанняў было яшчэ больш. Ужо сам за сябе гаворыць той факт, што ўдзельнікаў было каля 30 тысяч! Такія мерапрыемствы не могуць пакінуць раўнадушным нікога. Так што, плануем удзельнічаць у іх і надалей і прыцягваць да здаровага ладу жыцця членаў сваіх сем’яў.
Запісаў Аляксандр ХАХЛОЎ.