Новы спартыўны інвентар для школьнікаў Кіраўшчыны

Зіма сёлета шчодра адорвае нас марозцамі і снегам, таму аматары зімовых відаў спорту спяшаюцца атрымаць асалоду ад лыжных гонак ці катання на каньках. Асабліва радуюцца магчымасці весела і з карысцю правесці час на свежым паветры школьнікі.
У нашай вобласці і раёне ўсебаковаму развіццю падрастаючага пакалення надаецца належная ўвага. З гэтай нагоды сёлета ў школы Магілёўшчыны дадаткова было закуплена 1,4 тыс. пар лыж, мацаванняў да іх, лыжных ботаў і палак. Як нам паведамілі ў аддзеле па адукацыи, спорту і  турызму Кіраўскага райвыканкама, у наш раён паступіла 50 пар лыж “Целеханы” і столькі ж лыжных пар палак, 50 пар ботаў і мацаванняў для іх. Усе яны былі прапарцыянальна, у адпаведнасці з маючайся забяспечанасцю, размеркаваны паміж установамі адукацыі раёна.
Новы спартыўны інвентар дапаможа настаўнікам фізічнай культуры і здароўя навучыць рабят правільнай тэхніцы катання на лыжах, а школьнікам — атрымаць асалоду ад заняткаў зімовымі відамі спорту пры выкарыстанні сучаснага інвентару.
З мэтай прапаганды здаровага ладу жыцця сярод школьнікаў ва ўстановах адукацыі наладжаны пракат спартыўнага інвентару, маюцца каткі і лыжныя трасы. У свой вольны час рабяты маюць магчымасць пакатацца на каньках і лыжах, паганяць шайбу.