Трыумфальна завяршыла выступленне на рэспубліканскіх спаборніцтвах па зімовым мнагаборстве “Здароўе” каманда Магілёўскай вобласці. У агульным заліку яна заняла І месца. Адметна, што палову зборнай складалі прадстаўнікі Кіраўшчыны — спартсмены Паўлавіцкай СШ імя Р.А.Худалеева. Аб гэтым расказаў галоўны трэнер і прадстаўнік зборнай каманды Магілёўшчыны Валерый Вароніч.

Згодна рэгламенту спаборніцтваў у каманду ўваходзіла 14 чалавек: па сямёра хлопчыкаў і дзяўчынак. Акрамя рабят з Бабруйскага, Хоцімскага і Клімавіцкага раёнаў, якія ўсе разам склалі адну сямёрку спартсменаў, у зборную Прыдняпроўскага краю былі ўключаны нашы Соф’я Лысянкова (5 клас), Аліна Ермалаева (7 клас), Анастасія Котава (8 клас), Крысціна Лазарава (9 клас), Ганна Каравай (9 клас), Кацярына Сапега (11 клас) і Аляксей Хархалёў (8 клас).  Такое значнае прадстаўніцтва кіраўчане атрымалі ўпершыню — пасля ўдалага выступлення на абласным этапе, дзе каманда нашага раёна ў асобе паўлавіцкіх школьнікаў заняла 2-е месца.

Фінал праходзіў у Віцебску, куды з’ехаліся 6 каманд з усіх абласцей Беларусі.

У першы дзень праходзілі спаборніцтвы паміж вучнямі 9-11 класаў па стральбе з пнеўматычнай вінтоўкі. Лідарства захапіла зборная Магілёўшчыны, прадстаўнікі якой былі больш трапнымі.

Пасля другога дня, у які праводзіліся спаборніцтвы па гімнастыцы (для хлопчыкаў — падцягванне на перакладзіне, для дзяўчынак — згібанне-разгібанне рук ва ўпоры лежачы) лепшыя рэзультаты паказалі гаспадары-віцябляне.

Усё вырашалі лыжныя гонкі трэцяга дня. Ужо было зразумела, што камплект узнагарод разыграюць паміж сабой каманды Віцебскай, Магілёўскай і Мінскай абласцей, якія істотна адарваліся ад астатніх зборных. Але хто ж будзе пераможцам?..

Рэзультаты аказаліся вельмі шчыльнымі. Дастаткова адзначыць, што ў скарбонцы кожнай з каманд-прызёраў па суме трох дзён было за 1700 ачкоў, а ў выніковым пратаколе разрыў паміж першым і трэцім месцамі склаў усяго 10 балаў.

Прадстаўнікі зборнай Прыдняпроўскага краю змаглі-такі вырваць перамогу,  набраўшы 1765 ачкоў, абышоўшы на 6 балаў каманду Міншчыны, якая, у сваю чаргу, на 4 пазіцыі абагнала віцяблян.

Камандзе-пераможцы быў уручаны Кубак, а кожны ўдзельнік атрымаў дыплом, медаль і грашовую ўзнагароду.