Першыя крокі кіраўчан у вялікі спорт

Незабыўныя ўражанні ад удзелу ў фінальных спаборніцтвах засталіся ў Мацвея Каранкевіча, Яны Лісоўскай і Дар’і Гаршковай з гімназіі горада, Максіма Няйштэтара і Настассі Котавай з Паўлавіцкай школы, а таксама ў Юліі Калінавай з СШ №1. Завяршальны этап “Шкаліяды”, які праходзіў у манежы Рэспубліканскага цэнтра алімпійскай падрыхтоўкі па лёгкай атлетыцы, стаў сапраўдным спартыўным святам. Пры перапоўненых трыбунах адбылося ўрачыстае адкрыццё. Яно пачалося з шэсця ўсіх юных спартсменаў-удзельнікаў — пераможцаў і прызёраў раённых і абласных этапаў “Шкаліяды”.
На працягу двух дзён школьнікі выяўлялі мацнейшых у чатырох відах: бегу на 30 м, скачках у даўжыню, кіданні мяча на дальнасць і бегу на 800 м (хлопчыкі) і 500 м (дзяўчынкі). Нашым рабятам даволі цяжка было канкурыраваць з сапернікамі, многія з якіх фактычна на прафесійным узроўні займаюцца лёгкай атлетыкай у спецыялізаваных установах. Тым не менш, кіраўчане паказалі дастойныя рэзультаты. А Яна Лісоўская толькі крыху не дацягнулася да п’едэстала гонару: у бегу на 30 м кіраўчанка паказала чацвёрты рэзультат.
Але кіраўчане могуць па праву ганарыцца тым, что ўвайшлі ў зборную каманду вобласці. Акрамя таго, рабяты акунуліся ў незабыўную атмасферу спартыўнага свята высокага ўзроўню. І хіба забудуцца юныя спартсмены з правінцыі пра цёплую сяброўскую размову з самім Вадзімам Дзевятоўскім! Славуты малатабоец, чэмпіён свету і Еўропы, прызёр Алімпійскіх гульняў, які зараз працуе на высокіх пасадах — намеснікам старшыні Пастаяннай камісіі Палаты прадстаўнікоў Нацыянальнага сходу Рэспублікі Беларусь па ахове здароўя, фізічнай культуры і маладзёжнай палітыцы, старшынёй Беларускай федэрацыі лёгкай атлетыкі, шчыра пагутарыў з нашымі юнымі землякамі і сфатаграфаваўся на памяць.
Аляксандр ХАХЛОЎ.