Праграма чарговага, 46-га Мемарыялу Героя Савецкага Саюза, Героя Сацыялістычнай Працы К.П.Арлоўскага па веласпорце, па традыцыі, пачалася ў а/г Мышкавічы дзіцячымі спаборніцтвамі па велагонках. Нягледзячы на спякоту, падрастаючая змена спартсменаў — мясцовыя да-шкаляты стараліся як мага хутчэй пераадолець дыстанцыю. Першае, другое і трэцяе месцы занялі адпаведна Аня Бегунова, Мікіта Пішчалін, Арсеній Бабіч, але на п’едэстал гонару з радасцю ўзняліся разам усе рабяты, задаволеныя аказаным ім гонарам удзелу ў спаборніцтвах і тым, што прыз атрымаў кожны з іх.
Далей каманды спартсменаў з усіх абласцей (акрамя Гродзенскай) і г.Мінска выстраіліся на пляцоўцы перад Мышкавіцкім СДК для ўрачыстага адкрыцця спаборніцтваў: як вядома, Мемарыял праводзіцца ў праграме чэмпіянату Рэспублікі Беларусь у гонцы-крытэрыуме.
Удзельнікаў спаборніцтваў ад імя раённай улады вітала намеснік старшыні райвыканкама Галіна Слабоднікава. Яна адзначыла, што гэтыя спаборніцтвы заваявалі заслужаны аўтарытэт і павагу сярод спецыялістаў і спартсменаў веласпорту. А ўвогуле ў нацыянальным веласпорце разам з майстрамі, якія шліфавалі свае навыкі на Мемарыяле К.П.Арлоўскага, высокі клас паказваюць і спартсмены Кіраўшчыны. Вольга Масюковіч, Яўген Шамсонаў і Раман Цішкоў неаднаразова станавіліся пераможцамі і прызёрамі чэмпіянату Рэспублікі Беларусь на трэку, прадстаўлялі нашу краіну на этапах Кубка свету, чэмпіянату Еўропы, дзе ўвайшлі ў дзясятку мацнейшых веласіпедыстаў. Сярод жанчын старэй 23 гадоў наша Вольга Масюковіч увайшла ў тройку лепшых велагоншчыц Беларусі. Сёлета выхаванцы аддзялення веласпорту Кіраўскай ДЮСШ занялі 2 месца на першым этапе Кубка РБ па шасейных гонках, 1 і 3 месцы — у чэмпіянаце РБ па веласпорце.
Веласпорт заўсёды быў і застаецца папулярным у нашым раёне. І гэта заслуга людзей, якія ўсё сваё жыццё прысвяцілі дадзенаму віду спорту. Галіна Слабоднікава выказала ўдзячнасць трэнерскаму саставу аддзялення веласпорту ДЮСШ у саставе У.С. Бяляўскага, які стаяў ля вытокаў Мемарыялу і ўсе гады з’яўляецца яго галоўным суддзёй, С.М.Клімовіча і Ю.Г.Цішкова за работу, якую яны праводзяць па развіцці і прапагандзе веласпорту.
Змянілася не адно пакаленне ўдзельнікаў Мемарыялу, але сама ідэя яго правядзення не мяняецца: памяць аб чалавеку-легендзе К.П.Арлоўскім жывая і заўсёды застаецца з намі.
Да бюста Кірылы Пракопавіча Арлоўскага спартсмены ўсклалі вянкі і кветкі.
Дзяржаўны трэнер РБ па веласпорце Алег Логвін выказаў удзячнасць арганізатарам спаборніцтваў, а таксама сваё задавальненне тым, што гэты гасцінны і ўтульны куток — а/г Мышкавічы дынамічна развіваецца, мяркуючы па шырокіх маштабах разгорнутых тут будаўнічых работ.
Далей быў дадзены старт групавой гонцы сярод мужчын на 132 км, а затым сярод жанчын — 66 км.
На наступны дзень адбылася гонка-крытэрыум. Мужчынам прадстаяла пеаадолець 80 км. Першыя тры месцы тут занялі прадстаўнікі Мінскай вобласці: Андрэй Шнырко, Мікіта Жаровень і Канстанцін Будкевіч. У гонцы-крытэрыуме сярод жанчын (40 км) першынствавала Настасся Сліж з Міншчыны, на 2 і 3 месцах адпаведна — Ксенія Касабуцкая (Брэсцкая вобл.), Ганна Навіцкая (г.Мінск).
Трэба адзначыць паспяховае выступленне на гэтых прэстыжных спаборніцтвах выхаванкі Кіраўскай ДЮСШ, майстра спорту Наталлі Хамід, якая выступала за каманду Магілёўскай вобласці і заняла 5 месца.
Вынікі на гонцы-крытэрыуме падводзіліся і сярод юніёраў.
У камандным заліку, як і летась, са значным адрывам па ачках перамогу святкавала Мінская вобласць. Далей месцы размеркаваліся наступным чынам: Віцебская, Брэсцкая, Гомельская, Магілёўская вобласці, г.Мінск.
На Мемарыяле, па традыцыі, былі арганізаваны спаборніцтвы сярод ветэранаў веласпорту на дыстанцыі ў 22 км. Прызавыя месцы дасталіся Андрэю Піўцэвічу, Мікалаю Бакланаву і Сяргею Кулікову. Прадстаўнік Кіраўшчыны Уладзімір Іванавіч Бяляўскі заняў 4 месца з васьмі.
На ўрачыстым закрыцці спаборніцтваў адбылося ўзнагароджванне пераможцаў і прызёраў. Кубак Мемарыялу К.П.Арлоўскага зноў накіраваўся ў Мінскую вобласць.
Наталля ХАДАКОВА.
Фота
Максіма
МІКЕШЫНА.