Стан здароўя ды і ўзрост прымушаюць усё часцей звяртацца за медыцынскай дапамогай і, зразумела ж,  лякарствамі. Набываю іх, як правіла, у нашай раённай аптэцы. І кожны раз пераконваюся, які  цудоўны калектыў тут працуе: тактоўны, паважлівы і ўважлівы да кожнага наведвальніка. Работнікі аптэкі — сапраўдныя прафесіяналы сваёй справы, варта прыгадаць, як хутка арыентуюцца ў вялізнай колькасці  назваў наяўных лекавых сродкаў. А яшчэ яны — добрыя дарадчыкі: дадуць карысную параду, растлумачаць, як правільна прымаць лекі, прапануюць узамен дарагога імпартнага лякарства больш танны, але не менш эфектыўны беларускі аналаг.
Узначальвае калектыў Зоя Валянцінаўна Цмыг. У яе працоўнай кніжцы ўсяго адзін запіс аб прыёме на работу ў раённую аптэку. У 1979 годзе пасля заканчэння Віцебскага дзяржаўнага ордэна Дружбы народаў медыцынскага інстытута па размеркаванні маладым спецыялістам яна пры-ехала ў Кіраўск. Тут знайшла прымяненне  сваім прафесійным навыкам і ведам, выйшла замуж, тут нарадзіліся дзеці.  Дачка, як і маці, абрала  шлях фармацэўта, закончыла Віцебскі медыцынскі ўніверсітэт, працуе ў Магілёўскім РУП “Фармацыя”, а сын пасля заканчэння Магілёўскага ўніверсітэта імя А.А.Куляшова вучыцца ў аспірантуры.
Калектыў  аптэкі выключна жаночы, ён вельмі дружны, згуртаваны. Старэйшыя і вопытныя супрацоўніцы дапамагаюць у прафесійным станаўленні сваім маладым калегам,   падтрымліваюць іх ва ўсім. Таму, да каго б з работнікаў аптэкі ні звярнуўся, атрымаеш аднолькава кваліфікаванае, ветлівае і добразычлівае абслугоўванне. І ў гэтым пераконваюся кожны раз, калі наведваю аптэку, маю задавальненне  гутарыць з яе работнікамі.
Больш за трыццаць гадоў працуе тут Ларыса Мікалаеўна Хурсава, два дзесяткі гадоў налічвае працоўны стаж Галіны Мікалаеўны Каранкевіч, не меншы — у Тамары Міхайлаўны Шубаравай, Ларысы Мікалаеўны Баравой, Святланы Мікалаеўны Лапацінскай.  Усе лепшыя прафесійныя і чалавечыя якасці пераймаюць у іх маладыя  фармацэўты-рэцэптары Вольга Мінчукова і Вікторыя Чумакова.
Дай Бог, каб на любым участку работы, а тым больш, такім набліжаным да  далікатнай сферы чалавечых пачуццяў і хваляванняў, як медабслугоў-ванне, працавалі такія чулыя людзі, сапраўдныя прафесіяналы, як у нашай раённай аптэцы!
Рыгор КАГАН,
г.Кіраўск.