У Віцебску прайшоў трэці тур чэмпіянату Рэспублікі Беларусь па пляжным футболе ў вышэйшай лізе. Нягледзячы на тое, што выдаўся ён, зыходзячы з надвор’я, самым халодным і даждлівым, для каманды “Кіраўск-СДЮШАР”, ён аказаўся самым удалым і рэзультатыўным: толькі крыху ім не хапіла, каб узяць максімальную колькасць ачкоў…

У кожны з двух гульнявых дзён васьмёрка застаўшыхся пасля першых двух тураў каманд правялі па 2 паядынкі.

У першым сваім матчы “Кіраўск-СДЮШАР” сустракалася са слонімскім “Фарсажам”. Гульня выдалася няпростай. Кіраўчанам тройчы па ходу яе даводзілася адыгрывацца, што, тым не менш, яны кожны раз і зрабілі. На тры галы слонімцаў двойчы дакладнымі ўдарамі адказаў Арцемій Дрозд і адзін раз — Іван Ляцецкі. І ўсё ж апошняе слова аказалася за нашымі хлопцамі: два трапныя стрэлы Юрыя Пятроўскага, і канчатковы лік — 5:3 на нашу карысць.

А вось наступны паядынак СДЮШАРаўцаў з лідарам чэмпіянату “Гроднааблспортам” стаў упрыгожваннем першага гульнявога дня і нагадваў сапраўдны трылер. Пляжнікі з берагоў Нёмана двойчы вялі з адрывам у 2 мячы (2:0 і 4:2). Здавалася, яшчэ крыху — і вопытныя гродзенцы “даціснуць” дзёрзкіх “выскачак” з глыбінкі. Але настойливыя кіраўчане сёлета не раз ужо даказвалі сваю непрымірымасць да прызнаных аўтарытэтаў і вось цяпер зноў перавярнулі ўсё з ног на галаву. Спачатку яны зраўнялі лік, а потым за мінуту да заканчэння асноўнага часу выйшлі і наперад — 5:4. Рашаючай стала апошняя мінута. Футбалісты Гродна зраўніваюць лік. Здавалася, гульня дойдзе да авертайму. Але за 18 секунд да канца асноўнага часу Арцемій Дрозд з пенальці ставіць пераможную кропку — 6:5! Чарговая валявая перамога! Галы ў кіраўчан у гэтым драматычным паядынку забівалі Іван Ляцецкі (2), Арцемій Дрозд (2), Міхаіл Гарбачоў і Юрый Пятроўскі.

Наступны гульнявы дзень і — чарговы экзамен для “Кіраўск-СДЮШАР”: сапернік — яшчэ адзін з лідараў чэмпіяната каманда “ProDOM”  з Брэста, якую селета вядзе наперад лепшы пляжны футбаліст Беларусі апошніх гадоў Ігар Брыштэль. Кіраўчане ў каторы раз у сезоне першымі прапускаюць. Але  зноў рашуча ідуць наперад, і праз пэўны час, дзякуючы намаганням Арцемія Дразда, Антона Акуліча і Юрыя Пятроўскага, лік становіцца ўжо 3:1 на нашу карысць. Але сіл не хапіла. Ды і Брыштэль зрабіў сваю справу, забіўшы за матч сваім колішнім аднаклубнікам 4 мячы. У выніку — крыўднае мінімальнае паражэнне брэстчанам 3:4, якія, дарэчы, пасля гэтага тура ўзначалілі турнірную табліцу.

Затое ў заключным матчы са “Шчучынам” кіраўскія СДЮШАРаўцы “адарваліся” на славу, “агрузіўшы” дэбютантам чэмпіянату ажно 10 мячоў. Канчатковы лік — 10:6. Героем матча ў кіраўчан стаў Іван Ляцецкі, які злавіў сапраўдны кураж, забіўшы 6 (!) разоў. Двойчы вызначыўся Акуліч, па адным разе — Гарбачоў і Пятроўскі.

Пасля чацвертага, заключнага тура, які 14-15 ліпеня пройдзе ў Шчучыне, будуць сфарміраваны пары суперфінала.

А пасля трэцяга турнірнае становішча выглядае наступным чынам:

“ProDOM” (Брэст)                   – 22

 “Гроднааблспорт”                  – 22

БАТЭ (Барысаў)                      – 18

“Кіраўск-СДЮШАР”             – 17

“Фарсаж” (Слонім)                  – 9

“М-Сіці” (Мазыр)                    – 8

Зборная Віцебскай вобл.       – 6

“Шчучын”                                  – 6

Аляксандр ХАХЛОЎ.