Фота носіць ілюстрацыйны характар

Нягледзячы на тое, што футбол у розных яго варыянтах лічыцца пераважна мужчынскім відам спорту, прадстаўніцы цудоўнай паловы чалавецтва ўсё больш заяўляюць аб сабе ў гульні №1. У спартыўнай зале СШ №1 у межах раённай спартакіяды школьнікаў прайшлі спаборніцтвы па міні-футболе сярод дзяўчынак 2003-2004 г.н., што адпавядае 7-10 класам. Аб іх расказаў галоўны спецыяліст аддзела па адукацыі, спорту і турызму Кіраўскага райвыканкама Максім Хамічэнка.

Пяць каманд, заяўленых да ўдзелу, праводзілі матчы па кругавой сістэме —  кожная з кожнай. І, трэба адзначыць, усе праявілі спартыўны азарт, а кожны паядынак быў даволі бескампрамісным. Менш за іншых пашчасціла футбалісткам СШ №2 імя К.П.Арлоўскага, якія хоць і дужа стараліся, але не змаглі ўзяць ніводнага ачка і замкнулі турнірную табліцу. Каманда Мышкавіцкай СШ з адной перамогай і трыма ачкамі адпаведна заняла 4-е месца. Футбалісткі Барчыцкага УПК ДС-СШ атрымалі 2 перамогі і з 6 ачкамі занялі трэці радок у турнірнай табліцы.

Найлепшую падрыхтоўку паказалі дзяўчаты з СШ №1 і Чыгірынскай СШ. У іх не было праблем з іншымі саперніцамі, а вось матч паміж сабой аказаўся вельмі напружаным і драматычным. Гаспадыні пасля дакладных удараў павялі ў ліку 2:0. Але госці з берагоў Чыгірынскага вадасховішча змаглі аднавіць раўнавагу. Кіраўчанкі зноў выйшлі наперад і ўтрымлівалі перавагу амаль да фінальнага свістка, аднак літаральна на апошняй секундзе іх саперніцы выратавалі матч — нічыя 3:3.

У выніку абедзьве каманды набралі па 10 ачкоў. Лёс першага месца згодна рэгламенту спаборніцтваў вырашыла розніца забітых і прапушчаных мячоў. Яна аказалася лепшай у каманды СШ №1, якая і стала пераможцай турніру.