Ёсць кіраўскія надзеі ў “Надзеі”
Жаночы футбол усё больш заваёўвае папулярнасць ва ўсім свеце. Не выключэнне і наша краіна, дзе ў гульню нумар адзін, здаўна прызнаную мужчынскай, усё больш становяцца ўлюбёнымі прадстаўніцы цудоўнай паловы чалавецтва.
Папулярызуецца жаночы футбол і ў нашым раёне. На базе ДЮСШ ёсць спартыўны клас, дзе дзяўчаты з райцэнтра і навакольных вёсак спасцігаюць футбольныя веды і навыкі. Пры гэтым перыядычна замацоўваюць іх за межамі раёна. І не без поспехаў!..
Днямі ў Магілёве прайшло першынство вобласці сярод дзяўчынак у межах Праграмы развіцця жаночага футбола ў краіне. Калі прасцей сказаць, гэта быў своеасаблівы “прагляд кадраў” у лепшыя жаночыя футбольныя клубы рэспублікі з мэтай іх умацавання.
Удалым можна лічыць выступленне на спаборніцтвах юных футбалістак нашага раёна. Прадстаўніцы спартыўнага класа ДЮСШ 2005-2006 гадоў нараджэння пад кіраўніцтвам трэнераў Валерыя Галомзіка і Максіма Хамічэнкі правялі тры сустрэчы з вельмі моцнымі саперніцамі. Напачатку нашы дзяўчаты больш чым упэўнена ўзялі верх над равесніцамі з Магілёўскага раёна — 8:1. Па чатыры галы ў нашай камандзе забілі нападаючыя Віялета Вацура і Карына Красная. Наступны матч такім удалым для кіраўчанак не атрымаўся. Процістаяла ім каманда ДЮСШАР-7 з Магілёва — рэзерв каманды майстроў “Надзея”, адной з мацнейшых каманд краіны. Кіраўчанкі змагаліся, але клас узяў верх: на адзіны гол Віялеты Вацура магіляўчанкі адказалі ажно сям’ю забітымі мячамі. А вось бліжэйшы рэзерв “Бабруйчанкі” нашы дзяўчаты адолелі ўпэўнена — 3:0, што дазволіла кіраўчанкам заняць другое месца. Усе мячы зноў на свой рахунак запісала Віялета Вацура. Трапнасць нашай нападаючай не засталася па-за ўвагай зацікаўленых асоб. Віялета ўжо спрабавала свае сілы ў магілёўскай “Надзеі” летась. І сёлета яна — кандыдат нумар адзін у нападаючыя каманды прафесіяналак.
Аляксандр ХАХЛОЎ.