Калі захоўваць тэхналогію і старанна працаваць… (Вопыт работы рассветаўскіх жывёлаводаў фермы Цяса)
Ужо не першы год прадстаўнікі жывёлагадоўчай галіны ААТ “Рассвет” імя К.П.Арлоўскага займаюць у працоўным спаборніцтве, праводзімым райкамам прафсаюза работнікаў АПК, лідзіруючыя пазіцыі па надоях малака, дарошчванні і вырошчванні маладняку БРЖ.
У іх ліку і невялікі, але зладжаны і адказны калектыў таварнай фермы “Цяса”, дзе ажыццяўляецца догляд за рамонтным маладняком БРЖ да 6-месячнага ўзросту. Сярэднясутачныя прывагі за мінулы год тут склалі 796 г, гэта лепшы паказчык у раёне.
Абслугоўваюць і даглядаюць цялят 6 чалавек: 4 аператары па дарошчванні — Святлана Гамершмідт, Ганна Сяргейчык, Алена Парфененка і Таццяна Костка, ветфельчар Валянціна Калеснік, даглядчык Віталь Бяляўскі. Узначальвае калектыў Валерый Сафончык. Кожны з іх — жывёлавод са стажам, валодае багатым прафесійным вопытам і такімі якасцямі, як неабыякавасць да выканання сваіх абавязкаў, імкненне дабівацца поспеху.
Усе цяляты, а зараз тут іх утрымліваецца 520 галоў, размешчаны ў хлеве па секцыях згодна ўзросту. Для таго, каб ім было цёпла, і яны не хварэлі, выкарыстоўваецца глыбокая падсцілка з саломы.
Як адзначыў загадчык фермы Валерый Сафончык, немалаважнымі аспектамі добрых прываг і захаванасці маладняку з’яўляюцца своечасовасць і збалансаванасць кармлення. Рассветаўцы ў гэтым плане строга прытрымліваюцца тэхналагічнага рэгламенту: выкарыстоўваецца толькі натуральнае пастэрызаванае малако, да 3-месячнага ўзросту выдаецца пакупны камбікорм КР-1, пазней — КР-2 уласнай вытворчасці. Свой станоўчы эфект у паляпшэнні захаванасці маладняку БРЖ дае і прымяненне пры кармленні электроннай мамай, з дапамогай якой кожны гадаванец знаходзіцца пад пастаянным кантролем. Выкарыстанне на ашыйніках цялят спецыяльных чыпаў, інфармацыя з якіх перадаецца на камп’ютар, дазваляе работнікам назіраць, як развіваецца жывёла, ці своечасова і ў поўным аб’ёме яна з’ядае неабходную норму кармоў. Калі ж цяляці доўгі час не п’е малако, гэта ўжо падстава для таго, каб яго агледзеў ветспецыяліст, высветліў прычыну.
Каб атрымаць добрую карову, неабходна працаваць з маладняком, пачынаючы з першых гадзін нараджэння, упэўнены загадчык таварнай фермы. Цяляці павінна атрымаць вызначаную дозу малодзіва. Толькі ў такім выпадку яно зможа мець пэўны імунітэт. Неабходна і ў далейшым прытрымлівацца паўнацэннага збалансаванага кармлення, прычым строга захоўваючы схемы.
Немалаважнымі складаемымі добрых прываг БРЖ з’яўляюцца сумленнасць, працавітасць і клапатлівыя адносіны да сваіх гадаванцаў работнікаў фермы.
Аператар Святлана Гамершмідт працуе на жывёлагадоўчым аб’екце “Цяса” амаль з моманту яго адкрыцця. Па словах жанчыны, іх ферма — своеасаблівы “дзіцячы садок”: усе гадаванцы патрабуюць пастаяннай увагі, пяшчоты і клопату. Гэта толькі на першы погляд яны ўсе падобныя адзін на аднаго, а на самой справе — розныя, кожны — са сваім характарам.
Трапляюць цяляты на “Цясу” да месячнага ўзросту, таму і адносяцца аператары да іх, як да малых дзяцей: прывучаюць самастойна піць малако, есці грубыя кармы. Асабліва прыходзіцца павазіцца з тымі, хто хварэе: ім патрабуецца асаблівы догляд, карміць даводзіцца з соскі.
Маладняк БРЖ знаходзіцца пад кругласутачным наглядам: ноччу аператары пазменна нясуць дзяжурства, у выпадку неабходнасці выклікаюць ветурача.
Увогуле, як адзначыў Валерый Сафончык, іх калектыў — гэта адзінае цэлае. Усе аднолькава клапоцяцца пра захаванасць маладняку, добрыя прывагі, працуюць не лічачыся з уласным часам. А інакш у нашай справе і нельга, — упэўнены Валерый Мікалаевіч, — бо непрыклаўшы намаганняў зараз, нельга ў будучым атрымаць карову з высокімі надоямі малака.
Пастаянная ўвага пытанню вырошчвання рамонтнага маладняку БРЖ на ферме “Цяса” надаецца і кіраўніцтвам таварыства: своечасова набываюцца неабходныя ветпрэпараты для вакцынацыі і лячэння цялят, закупляюцца якасныя і збалансаваныя камбікармы.
Адным жа з галоўных сакрэтаў пастаяннага дасягнення добрых вынікаў, загадчык фермы Валерый Сафончык лічыць строгае захоўванне тэхналогіі вырошчвання маладняку БРЖ.
Людміла СЯМЁНАВА.
Фота
Максіма МІКЕШЫНА.