Праца дзеля камфорту і прыгажосці – Кіраўскія камунальнікі адзначаюць прафесійнае свята
У чацвёртую нядзелю сакавіка ў Беларусі адзначаецца Дзень работнікаў бытавога абслугоўвання насельніцтва і жыллёва-камунальнай гаспадаркі.
Камунальная галіна ў Беларусі адна з самых старажытных, і яе стварэнне адносіцца яшчэ да першага тысячагоддзя. Што тычыцца Кіраўскай жыллёва-камунальнай гаспадаркі, то сваю дзейнасць яна пачала ў 1935 годзе.
Як кажуць, шмат вады выцекла з таго часу, гаспадарка некалькі разоў рэарганізоўвалася, але яе місія ва ўсе часы застаецца аднолькавай – задавальненне патрэб грамадзян і грамадскіх спажыўцоў у жыллёва-камунальных паслугах. І што б мы ні гаварылі, людзі, якія працуюць у гэтай галіне, заслугоўваюць асаблівай павагі, бо яны нясуць адказнасць за стварэнне камфортных умоў нашага жыцця: забяспечваюць цяплом, асвятляюць вуліцы, рамантуюць дамы, упрыгожваюць паркі, наводзяць чысціню і парадак на лесвіцах, на вуліцах і прыдамавых тэрыторыях і інш. І робяць гэта ў святы і будні, у любую пару года, не звяртаючы ўвагі на капрызы надвор’я.
Сёння размова пойдзе пра тых, хто робіць наш горад чыстым і прыгожым, а значыць, камфортным і ўтульным для пражывання. Не сакрэт, што з кожным годам Кіраўск становіцца больш прывабным. Акрамя нас, кіраўчан, чысціню і парадак на вуліцах, у дварах, багацце зеляніны і кветак заўважаюць і госці нашага горада. Да прыкладу, летась да мяне прыязджалі расіяне (якраз на день горада), і было вельмі прыемна пачуць ад жанчыны, якая ўпершыню наведала наш горад, наколькі ёй тут спадабалася.
Адказвае за чысціню і прыгажосць на вуліцах, у дварах і пад’ездах шматпавярховак майстар Ганна Камінская. Наўрад ці хто ў Кіраўску не ведае гэтага дзіўнага і таленавітага чалавека, які валодае выдатным густам і шырокімі ведамі ў галіне батанікі. Ураджэнка Акцябрскага раёна Гомельскай вобласці ў 1978 годзе пераехала сюды разам з мужам і з тых пор лічыць Кіраўск сваім родным горадам. Доўгі час жанчына працавала на ачышчальных збудаваннях, і вось ужо сёмы год з’яўляецца майстрам у горадзе. Як адзначае кіраўніцтва прадпрыемства, Ганна Савельеўна – выдатны спецыяліст, любіць сваю справу і мае зацікаўленасць у яе выніках. Нягледзячы на тое, што кантынгент яе падначаленых няпросты, яна ўмее іх арганізаваць, бо да кожнага падыходзіць індывідуальна, з душой.
“Да любога чалавека можна знайсці падыход. Праўда, мне даводзіцца гэта рабіць як да сваіх падначаленых, так і да тых, для каго мы працуем, – гаворыць Ганна Савельеўна. – Чаго граху таіць, бывае ўсякае. Але ж вельмі хочацца, каб было як мага менш непрыемных момантаў, а падзяк – як мага больш. Лічу, што мае працаўнікі гэтага заслугоўваюць. Я ім часта кажу, што яны ў мяне самыя лепшыя! І гэта сапраўды так, бо менавіта іх стараннасцю, рукамі і спінамі ствараецца ўтульнасць, падтрымліваецца чысціня”.
З надыходам вясны ў Ганны Камінскай павялічваецца клопатаў. Ёсць план, ужо гатова першая расада кветак, якую, дарэчы, вырошчваюць самі камунальнікі ва ўласнай цяпліцы. Як толькі дазволіць надвор’е – нашы вуліцы “расцвітуць”, а пакуль клопат гаспадыні накіраваны на навядзенне санітарнага парадку ў горадзе, падрыхтоўку клумбаў.
“Рабіць горад чыстым, прыгожым і ўтульным – наша галоўная задача, – адзначае майстар. – Усяму, што раблю зараз, я навучылася ў дзяцінстве. Дапамагала бацькам па гаспадарцы, палола градкі, кветнікі. Усё гэта мне падабалася. Сваю ролю адыграла і вучоба ў Жыліцкім тэхнікуме. Я і зараз вучуся: калі бываю ў іншых гарадах, вёсках, то звяртаю ўвагу на добраўпарадкаванне і, калі што падабаецца, то яно знаходзіць сваё месца на вуліцах Кіраўска”.
Відавочна, што мая суразмоўніца – шчаслівы чалавек, любіць сваю работу, людзей, з якімі і для якіх працуе, зямлю і кветкі… А самае вялікае шчасце Ганны Савельеўны – дзве дачкі, сямёра ўнукаў і праўнучак. Усе яны любяць сваіх бацькоў, бабулю і дзядулю, любяць прыязджаць да іх, бо ведаюць, што іх тут заўсёды чакаюць…
Галіна РУСЕЦКАЯ.
Фота Максіма МІКЕШЫНА.