На арэне пляжных відаў спорту стадыёна Кіраўскай ДЮСШ прайшоў першы этап Рэгіянальнага чэмпіяната Рэспублікі Беларусь — чэмпіяната Магілёўскай вобласці па пляжным футболе.

Удзел прынялі 5 каманд. Кіраўск прадставілі дзве: дарослая каманда ДЮСШ і “Юнацтва”, у саставе якой выступаюць дублёры. У госці да кіраўчан завіталі каманда “ФЛК” з Магілёва, ПФК “Бабруйск” і “Рассвет” з Мышкавіч.

Пляжная разнавіднасць гульні №1 на Магілёўшчыне пакуль яшчэ не заваявала шырокую папулярнасць. Нават у двух буйнейшых гарадах Прыдняпроўскага краю — Магілёве і Бабруйску — робяцца першыя крокі ў развіцці біч-сокера. Кіраўск у гэтым плане выглядае першапраходцам: каманда нашага райцэнтра не першы сезон выступае ў чэмпіянаце Беларусі, менавіта ў нас маецца адзіная пакуль пляжнафутбольная пляцоўка — адна з лепшых у краіне.

Нездарма, зыходзячы з гэтага, гаспадары яшчэ да пачатку паядынкаў лічыліся фаварытамі. І гэта пацвердзілася падчас гульняў з апанентамі. Нават без асноўных ігракоў, якія выступаюць у чэмпіянаце краіны, маладыя пляжнікі ДЮСШ паказалі назапашаны вопыт гульні ў пляжны футбол і праявілі куды вышэйшы ўзровень падрыхтоўкі, чым сапернікі. Кіраўчане ўпэўнена перамаглі каманды Бабруйска — 7:3, Магілёва — 4:0 і мінімальна адолелі землякоў: “Рассвет” — 4:3 і “Юнацтва” — 2:1. Без страт ачкоў спартшколаўцы занялі першае месца.

Добрыя камандныя дзеянні, тэхнічную падрыхтоўку паказалі і юныя выхаванцы ДЮСШ. Школьнікі з “Юнацтва” перамаглі “рассветаўцаў” — 5:1, магіляўчан — 3:2. Сустрэча з “Бабруйскам” завяршылася ўнічыю — 2:2, а ў серыі пенальці “Юнацтва” ўзяла верх. І толькі ў матчы, у якім вызначаўся лёс першага месца, малодшыя кіраўчане мінімальна саступілі старэйшым землякам.

Астатнія сустрэчы завяршыліся наступным чынам: “ФЛК” — ПФК “Бабруйск” — 4:5, ПФК “Бабруйск” — “Рассвет” — 5:3, “ФЛК” — “Рассвет” — 5:1.

У бліжэйшыя выхадныя каманды першай чацвёркі сустрэнуцца ў суперфінале. Каманда, заняўшая першае месца, атрымае права ў наступным сезоне выступаць у першай лізе чэмпіяната Рэспублікі Беларусь.

Аляксандр ХАХЛОЎ.