У Жлобіне прайшоў традыцыйны рэспубліканскі турнір па інтэлектуальных гульнях сярод школьнікаў “На ростанях-2016”. Стала ўжо добрай традыцыяй, што практычна ніводныя спаборніцтвы на ўзроўні вобласці і рэспублікі не абыходзяцца без прадстаўніцтва членаў інтэлектуальнага клуба “Эрудыт” пры Кіраўскім раённым Цэнтры дадатковай адукацыі дзяцей і моладзі. У гэты раз удзел у жлобінскім турніры прынялі чатыры нашы каманды: 2 — старэйшага ўзросту і па адной — ювеналы і сярэдняга школьнага ўзросту.

Для ўсіх удзельнікаў былі падрыхтаваны аднолькавыя пытанні і заданні, а вось заліковы багаж ачкоў размяркоўваўся адпаведна ўзроставых катэгорый. Ніводная з каманд — падапечных трэнера Ігара Лукашова — не засталася без месцаў на п’едэстале, прычым большасць — двойчы. Так, каманда “3+2” заняла другое месца ў “Сваёй гульні” і гульні “Што? Дзе? Калі?”, каманда “Ікра з Чайкамі” стала другой у “Што? Дзе? Калі?” і трэцяе — у “Інтэлектуальнай шкатулцы”. “Ліпавыя дзявятачнікі” і “Нягодніцкія дзеці” заваявалі “срэбра” ў “Сваёй гульні”, а апошнія дадалі яшчэ другое месца і ў “Што? Дзе? Калі?”.

Што ж, рэзультаты выглядаюць дваяка. З аднаго боку, сем дыпломаў і прызавых месцаў — выдатны вынік паездкі ў Жлобін. Зноў кіраўскія эрудыты паказалі свой стабільна высокі інтэлектуальны ўзровень. Але ж усе мы так ужо прызвычаіліся да перамог кіраўчан…  І так крыўдна, што “золата” ў кожнай з нашых каманд засталося на ўзроўні “выцягнутай рукі”. І ўсё ж рабяты, безумоўна, малайцы. Так трымаць!

Аляксандр ХАХЛОЎ.

На здымку: кіраўнік клуба “Эрудыт” Ігар Лукашоў і яго выхаванцы падчас трэніроўкі ў клубе.

Фота аўтара.