На сёлетняй міжнароднай спецыялізаванай выставе “Хлебная і кандытарская справа-2015”  была прадстаўлена прадукцыя вытворчага аддзела райспажыўтаварыства: хлебец “Асаблівы з разынкам” і булка “Здравушка”, якія папоўнілі скарбонку хлебапёкаў двума медалямі — залатым і сярэбраным.

Праходзячы міма базы вытворчага аддзела, адразу адчуваеш пах свежавыпечанага хлеба. Ён узмацняецца, калі заходзіш у цэх: погляд адразу ж кідаецца на пышныя боханы з залацістымі апетытнымі скарыначкамі — іх толькі што дасталі з печы.
Колькі людзей працавалі дзеля таго, каб у спажыўцоў кожны дзень на стале быў хлеб! На палетках сельгасарганізацый шчыравалі механізатары: яны сеялі, даглядалі, убіралі збажыну, дастаўлялі на прыёмныя пункты дзяржавы. Затым на млынкамбінатах са збожжа атрымлівалі муку, расфасоўвалі яе і рэалізоўвалі. А ўжо каб выпекчы смачную прадукцыю — за справу бяруцца пекары.
Асартымент назваў прадукцыі, якую выпускаюць работнікі вытворчага аддзела райспажыўтаварыства, значны — звыш 40 адзінак. У сярэднім за месяц спажыўцам пастаўляецца 150 т хлеба, хлебабулачных і кандытарскіх вырабаў. Геаграфія паставак прадукцыі: не толькі свой раён, але і горад Бабруйск, Бабруйскі раён. Акрамя гандлёвай сеткі, якасную прадукцыю атрымліваюць установы сацыяльнай сферы: школы, дзіцячыя садкі, бальніцы.
— Хлеб быў і застаецца самым запатрабаваным прадуктам. Як ва ўсе часіны, ён і зараз — усяму галава,— адзначыў выконваючы абавязкі начальніка вытворчага аддзела Мікалай Бяляўскі. А каб не было нараканняў на яго якасць, старанна працуюць нашы хлебапёкі.
І з гэтым нельга не згадзіцца. Хлебабулачныя і кандытарскія вырабы чакаюць і гараджане, і жыхары сельскіх населеных пунктаў. Таму на прадпрыемстве строга выконваюць графік пастаўкі прадукцыі, пададзеныя заяўкі задавальняюцца ў поўным аб’ёме.
Аб тым, што прадукцыю вытворчага аддзела ведаюць, яна карыстаецца пастаянным попытам, сведчаць дыпломы, медалі з рэспубліканскага конкурсу хлебабулачных і кандытарскіх вырабаў “Ласунак”. Кіраўчане штогод прымаюць у ім удзел: рэкламуюць свае вырабы, вучацца ў іншых. І заўсёды прадстаўнікі райспажыўтаварыства вяртаюцца са знакамі прызнання, як сёлета.
Таццяна БАРАДЗІНА.

На здымку: узнагароды дэманструе майстар-пекар 5 разраду Вольга Хадакова, прысвяціўшая амаль 40 гадоў жыцця высакароднай справе — выпечцы хлебабулачных і кандытарскіх вырабаў.