Ганарымся нашай зямлячкай!
Спецыяльная прэмія “Чалавек года” Магілёўскага аблвыканкама прысуджана прадстаўніцы нашага раёна — аператару машыннага даення СВК “Рассвет” імя К.П.Арлоўскага Валянціне Клімовіч. Яна стала лаўрэатам у ліку 15 заслужаных людзей Магілёўшчыны розных сфер дзейнасці за поспехі і дасягненні ў 2015 годзе.
Нагадаем, што мінулы год стаў для Валянціны Леанідаўны Клімовіч вельмі знамянальным: яна была ўдастоена ордэна Пашаны — гэтая высокая дзяржаўная ўзнагарода далучылася да медаля “За працоўныя заслугі”.
Спецыяльная прэмія “Чалавек года” была ўручана на ўрачыстым мерапрыемстве ў г.Магілёве, якое адбылося ў мінулы аўторак. У састаў дэлегацыі нашага раёна ўваходзіла поўны кавалер ордэна Працоўнай Славы Людміла Нічыпараўна Палевіч.
На цырымоніі ўручэння прэмій старшыня аблвыканкама Уладзімір Даманеўскі адзначыў: “Вось ужо пятнаццаты год мы ўшаноўваем лепшых з лепшых прадстаўнікоў Прыдняпроўскага краю. Дзякуючы ўпартай і самаадданай працы гэтых людзей рэгіён не толькі развіваецца, але і становіцца больш пазнавальным далёка за межамі краіны. Прыемна, што ва ўсіх сферах жыцця ў нас ёсць перадавікі, на прыкладзе работы якіх мы можам вучыцца”.
Кіраўнік вобласці выказаў упэўненасць, што такія заслужаныя ўзнагароды натхняюць іх уладальнікаў на новыя, больш высокія дасягненні ў працы, а паспяховы прыклад лаўрэатаў стане стымулам для многіх жыхароў Прыдняпроўскага краю на высакародную, дабратворную і стваральную працу.
Губернатар уручыў лаўрэатам спецыяльныя дыпломы, грашовыя прэміі і кветкі.
Па прыездзе на Кіраўшчыну Валянціна Клімовіч падзялілася ўражаннямі з супрацоўнікамі “раёнкі”:
— Вельмі ўразіла ўрачыстая атмасфера, якая панавала на працягу ўсяго мерапрыемства. У наш адрас выказваліся шчырыя словы ўдзячнасці за добрасумленную працу. Нягледзячы на тое, што мне неаднойчы на розных узроўнях даводзілася атрымліваць узнагароды, усё ж хвалявалася. Разам з тым, было прыемна, што мае старанні ацэньваюцца так высока.
Прысуджэнне спецыяльнай прэміі Магілёўскага аблвыканкама “Чалавек года” паслужыць выдатным стымулам працаваць яшчэ лепш, каб уносіць важкі ўклад у агульныя поспехі калектыву гаспадаркі, рэгіёна, роднай Беларусі.
