Па выніках заключнага этапа рэспубліканскай алімпіяды па працоўным навучанні вучаніца 11 класа СШ №1 Юлія Багданава заваявала дыплом II ступені, тым самым пацвердзіўшы статус стыпендыята спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў.
Юлія трэці год запар прадстаўляла наш раён у саставе каманды Магілёўскай вобласці. Сёлета заключны этап алімпіяды праходзіў у г.Кобрыне. Ён уключаў тэарэтычны, практычны і творчы туры.
У тэарэтычным туры на працягу гадзіны трэба было адказаць на пытанні ў тэставай форме, у практычным — паказаць майстэрства ў стварэнні швейнага вырабу, у творчым — абараніць індывідуальныя (дамашнія) праекты. У Юліі быў праект ільнянога касцюма “Кветкавае ззянне”.
Пасля алімпіяды Юлія Багданава падзялілася ўражаннямі са сваімі аднакласнікамі: “Самым складаным для мяне аказаўся творчы тур. Па-першае, па жэрабю, мне выпаў №32, апошні. Больш сямі гадзін чакання не спрыялі ўмацаванню спакою. Па-другое, свой адбітак наклала onlain-трансляцыя: я бачыла недалікі, промахі саперніц і хвалявалася, што нешта падобнае можа здарыцца са мной. Па-трэцяе, камісія была настроена вельмі сур’ёзна, пытанні задаваліся складаныя, і трэба было хутка прыйсці ў сябе і знайсці правільны адказ.”
Па словах дзяўчыны, дабіцца высокіх рэзультатаў ёй дапамагло жаданне ўдзельнічаць у алімпіядзе, пастаянная падрыхтоўка, упартасць і матывацыя.
Аб усім гэтым рэдакцыі паведаміла намеснік дырэктара па вучэбнай рабоце СШ №1 Л.Г.Царанок.