Як паведамлялася раней, па выніках раённых спаборніцтваў па міні-футболе сярод школьніц была сфарміравана зборная каманда раёна для ўдзелу ў занальных спаборніцтвах. У яе ўвайшлі дзяўчаты з абедзвюх гарадскіх школ, а таксма Чыгірынскай СШ і Барчыцкага НПК ДС-СШ. З міні-футбалісткамі актыўна папрацаваў трэнерскі састаў — галоўны трэнер Валерый Галомзік і яго асістэнты Аляксандр Каспяровіч і Сяргей Іваніцкі. І гэта дало свой плён.

На занальным турніры, які, дарэчы, праходзіў у Бабруйску, для таго, каб трапіць у фінальную частку абласных спаборніцтваў, кожнай з каманд неабходна было заняць адно з першых двух месцаў. Усе астатнія ад плэй-оф “адсякаліся”. Першапачаткова галоўным фаварытам лічыліся гаспадыні пляцоўкі, якія прадстаўляюць сабой юны рэзерв “Бабруйчанкі” — удзельніцы чэмпіянату краіны. Традыцыйна моцнымі з’яўляюцца саставы каманд з Асіповіч, Клічава. Але кіраўчанкі практычна перавярнулі ўсё з ног на галаву.
Турнір, аднак, для нашых зямлячак пачаўся з “халоднага душа”, які ім “уключылі” футбалісткі Асіповіч. Ужо ў дэбюце сустрэчы ў нашы вароты ўляцелі адзін за адным тры мячы! Але схамянуліся кіраўчанкі хутка, дзякуючы ўмеламу кіраўніцтву трэнераў. Аказалася, што гэта была разгубленасць некалькіх мінут з-за нявопытнасці. Што і пацвердзіў канчатковы лік — 4:4.
А ў матчы з саперніца­мі з Клічава, наадварот, падвяла самаўпэўне­насць: дамініруючы па ходу сустрчы, наша каманда ўпусціла важную перамогу — зноў нічыя 3:3 і зноў страта ачкоў.
Турнірныя перыпетыі яшчэ давалі шанцы на выхад у фінал, але для гэтага трэба было перамагаць у далейшых матчах. У трэцім з іх кіраўчанкі ўсухую разграмілі саперніц з Бабруйскага раёна — 8:0. І вось наперадзе — грозныя гаспадыні з Бабруйска. Паядынак выдаўся вельмі бескампрамісным па напалу барацьбы. Бабруйчанкі яўна недаацанілі саперніц, а госці святкавалі важнейшую перамогу 3:1 і практычна забяспечылі сабе паездку ў Магілёў!
Апошні матч з Быхавам для нашых дзяўчат асабліва нічога не вырашаў, але і яго яны правялі больш чым упэўнена, атрымаўшы сухую перамогу 3:0.
Акрамя каманды Кіраўска выхаду ў фінал дабіліся-такі і міні-футбалісткі Бабруйска.