Кіраўскія велагоншчыцы паспяхова выступілі на першынстве Мінскай вобласці
На велатрэку ў Мінску адкрылі новы сезон беларускія велагоншчыкі. На мінулым тыдні тут прайшло адкрытытае першынство Мінскай вобласці. Хаця без перабольшвання двухдзённыя спаборніцтвы можна назваць чэмпіянатам Беларусі , бо сабраліся на іх у пераважнай большасці лепшыя веласіпедысты краіны. Выдатных поспехаў зноў дабіліся нашы дзяўчаты — былыя выхаванкі аддзялення веласпорту Кіраўскай ДЮСШ. Аб гэтым расказаў рэдактару інтэрнет-рэсурса рэдакцыі раённай газеты”Кіравец” яго старшы трэнер Сяргей Клімовіч.
Толькі вопыту крыху не хапіла Ганне Васільковай, каб трапіць у лік прызёраў 2-кіламятровай гонкі сярод юніёраў. Дзяўчына лідзіравала практычна на ўсёй дыстанцыі, але на самых апошніх метрах , яе абышлі саперніцы. Затое на другі дзень наша зямлячка ўлічыла недахопы. Як вынік — два “срэбры” — у новым відзе гонак з заліковымі ачкамі “тэмпа” і гонцы з выбываннем.
У старэйшай узроставай групе сярод дзяўчат яшчэ больш упэўнена дамініравалі кіраўчанкі. Бліскучы падарунак да ўласнага дня нараджэння зрабіла Ангеліна Шчарбакова. Яна стала пераможцай у “скрэтчы” і групавой гонцы і ўзяла “бронзу” ў гонцы з выбываннем! Падтрымалі яе і сяброўкі-зямлячкі: Вікторыя Рудакова стала выйграла гонку з выбываннем і стала другой у гонцы “тэмпа”, а Марыя Зайцава забяспечыла сабе “срэбра” ў групавой гонцы і “бронзу”ў гонцы “тэмпа”. Што і казаць — дружна спрацавалі!