У Магілёве прайшла чарговая абласная Спартакіяда школьнікаў па веласіпедным спорце. Гэта адны з асноўных спаборніцтваў у сезоне для такіх аддзяленняў, якое маецца на базе нашай СДЮШАР. Прыемна канстатаваць, што вось ужо на працягу шэрагу гадоў прадстаўнікі Кіраўскай веласіпеднай школы з’яўляюцца заканадаўцамі мод у гэтым відзе і ўпэўнена трмаюць пальму першынства. Не стала выключэннем і сёлетняя Спартакіяда.

Спаборніцтвы насілі адкрыты статус. Акрамя каманд з Магілёўшчыны, удзел прынялі прадстаўнікі Мінска, Рэчыцы, Полацка, Буда-Кашалёва. Усяго ўдзельнічала 8 каманд. Уіх было заяўлена па 6 юнакоў і 6 дзяўчат. Акрамя таго, некаторыя ўдзельнічалі ў асабістым заліку. У каманды ўвайшлі як сённяшнія школьнікі, якія займаюцца ў аддзяленні веласпорту СДЮШАР, так і былыя выхаванцы, якія вучацца ў іншых установах адукацыі і падыходзяць па ўзросце.

Усе веласіпедысты раёна паказалі добрую падрыхтоўку і прынеслі заліковыя ачкі ў агульную скарбонку каманды, што і прадвызначыла далейшы агульны поспех. Асобна варта адзначыць Вікторыю Рудакову, якая стала пераможцай групавой гонкі, Ангеліну Шчарбакову, заняўшую ў гэтым жа заездзе 2 месца. Вылучым таксама Паліну Конрад, якая, нягледзячы на тое, што маладзейшая сваіх саперніц не менш, чым на 3 гады, здолела заняць высокае 5 месца. Яна ж у гонцы-крытэрыўме заваявала “бронзу”, а яе сяброўка па камандзе Ангеліна Шчарбакова — “срэбра”. Блізка да прызавых месцаў размясціліся ў заездах юнакі.

У агульнакамандным заліку кіраўчане набралі найбольшую суму балаў і зноў упэўнена сталі пераможцамі! Цяпер мацнейшыя гоншчыкі будуць рыхтавацца да рэспубліканскага этапу Спартакіяды, які пройдзе 14-18 чэрвеня ў Мінску.

Юрый ЦІШКОЎ, старшы трэнер СДЮШАР па веласпорце.