1 верасня ў г.Іванава падчас святкавання XXV Дня беларускага пісьменства адбыўся фінал Рэспубліканскага конкурсу юных чытальнікаў “Жывая класіка”. Тысячы хлопчыкаў і дзяўчынак з усёй рэспублікі спачатку дэманстравалі свой талент у раённых і абласных этапах, у фінал выйшлі 12 чалавек. Сярод удзельнікаў рэспубліканскага этапу была і Дар’я Ананіч, выхаванка Цэнтра дадатковай адукацыі дзяцей і моладзі г.Кіраўска, вучаніца СШ №1, якая ў сваёй узроставай катэгорыі (9-10 кл.) заваявала трэцяе месца. Сваімі ўражаннямі яна па­дзялілася з чытачамі “раёнкі”:
— У першы дзень адбыўся сам конкурс, які прайшоў у форме канцэрта: выступленні
ўдзельнікаў чаргаваліся з творчымі нумарамі музыкаў. Я дэкламавала верш Ганны Міклашэвіч “За цябе, мая вёска, малюся!”. Нягледзячы на тое, што часта ўдзельнічаю ў падобных конкурсах, перад выступленнем вельмі хвалявалася. Але як толькі выйшла на сцэну, забылася пра ўсё акрамя верша.
Усе канкурсанты праявілі сябе дастойна, было цікава назіраць за сапернікамі, якія дэкламавалі вершы і ўрыўкі з прозы на тэму вайны, некаторыя выступілі з байкамі. Многія з нас выбралі творы, прысвечаныя тэме малой Радзімы.
Далей было доўгачаканае падвядзенне вынікаў і ўзнагароджанне. Пераможцам уручылі дыпломы розных ступеняў ад міністэрстваў адукацыі і інфармацыі Рэспублікі Беларусь, у якасці падарунка мы атрымалі пуцёўкі ў Нацыянальны дзіцячы адукацыйна-аздараўленчы цэнтр “Зубраня”, куды паедзем будучай вясной. Прыемным сюрпрызам стала дзіцячая мастацкая беларуская літаратура і часопісы, якія атрымаў кожны з нас.
Нам, удзельнікам фіналу, было прыемна пачуць шчырую ўдзячнасць ад намесніка міністра інфармацыі І.І.Бузоўскага. Ён адзначыў, што конкурс ахапіў не толькі дзяцей, але і бацькоў, педагогаў, і выказаў спадзяванне, што ў далейшым усё шырэй будзе кола тых, каго аб’ядноўвае беларуская мова і гэты праект.
Другі дзень запомніўся экскурсіяй у музей імя Ф.М.Дастаеўскага, дзе мы атрымалі магчы­масць бліжэй пазнаёміцца з жыццём і творча­сцю знакамітага класіка.
У цэлым засталіся вельмі яркія ўражанні ад мерапрыемства, маштаба і ўзроўню яго арганізацыі. Не толькі гэты конкурс, але і святкаванне Дня беларускай пісьменства — добрая падстава для захавання роднай мовы, самабытнай беларускай культуры, традыцый нашага народа. І я вельмі ганаруся, што мела магчымасць удзельнічаць у гэтым.
Падрыхтавала Юлія ЗАВІШАВА.
Фота аўтара.