Прафесія, ад якой залежыць жыццё
На базе Магілёўскага дзяржаўнага медыцынскага каледжа прайшоў абласны этап рэспубліканскага конкурсу прафесійнага майстэрства «Лепшая ўрачэбная і фельчарская брыгада хуткай медыцынскай дапамогі». Конкурс стаў не толькі спаборніцтвам прафесійных навыкаў, але і сапраўднай праверкай вытрымкі, хуткасці прыняцця рашэнняў і ўмення працаваць у камандзе.
За званне лепшых змагаліся 20 брыгад: 2 урачэбныя і 18 фельчарскіх. Кожны ўдзельнік прыехаў з жаданнем паказаць высокі ўзровень падрыхтоўкі, абмяняцца вопытам з калегамі і даказаць, што ў экстранай медыцыне няма месца выпадковасцям. Тут важныя веды, упэўненасць, дакладнасць дзеянняў і здольнасць захоўваць спакой нават у самых складаных сітуацыях.
Аб удзеле ў конкурсе Аляксея Чужынава і Івана Аліхвера, фельчараў выязной брыгады, якая выязджае самастойна, Кіраўскай ЦРБ расказала галоўны ўрач райбальніцы Таццяна ДЗМІТРУК:
– Праграма конкурсу ўключала тэарэтычную і практычную часткі. Удзельнікам трэба было прадэманстраваць веды па аказанні экстранай медыцынскай дапамогі, правільна ацаніць стан пацыента, вызначыць тактыку далейшых дзеянняў і аператыўна выканаць неабходныя маніпуляцыі. Практычныя заданні былі максімальна набліжаны да рэальных сітуацый, з якімі супрацоўнікі хуткай дапамогі сутыкаюцца штодня.
Праца фельчара выязной брыгады патрабуе не толькі глыбокіх прафесійных ведаў. Часта менавіта ад першых дзеянняў медыцынскага работніка залежыць стан і далейшы лёс пацыента. Неабходна за лічаныя мінуты ацаніць сітуацыю, прыняць рашэнне, аказаць дапамогу і пры гэтым не разгубіцца. Таму падобныя конкурсы маюць асаблівае значэнне: яны дазваляюць праверыць гатоўнасць спецыялістаў да працы ва ўмовах, калі лік сапраўды ідзе на мінуты.
Аляксей Чужынаў і Іван Аліхвер дастойна прадставілі наш раён на конкурсе. Ва ўмовах сур’ёзнай канкурэнцыі яны паказалі добрую прафесійную падрыхтоўку, зладжанасць і ўпэўненасць у сваіх дзеяннях. Па выніках абласнога этапу нашы работнікі занялі ганаровае чацвёртае месца. Да прызавой тройкі ім не хапіла зусім мала, але чацвёртае месца ў такім прадстаўнічым конкурсе – гэта дастойны вынік і сведчанне высокага ўзроўню прафесіяналізму.
Для медыцынскіх работнікаў удзел у падобных спаборніцтвах – гэта магчымасць не толькі выпрабаваць сябе, але і атрымаць новы вопыт, убачыць моцныя бакі калег, абмяняцца ведамі і яшчэ раз пераканацца: прафесійнае майстэрства складаецца з пастаяннага навучання, практыкі і адказнасці.
Віншуем кіраўчан з годным выступленнем! Жадаем ім вытрымкі, упэўненасці ў сваіх сілах і новых прафесійных поспехаў. Няхай кожны рабочы выезд заканчваецца галоўным вынікам – своечасова аказанай дапамогай і выратаваным жыццём.
Падрыхтавала Галіна РУСЕЦКАЯ.
