Юная “зорачка” 8-гадовая Анастасія Зайцава – вучаніца дзіцячай школы мастацтваў – не раз радавала кіраўчан сваім музычным талентам. У яе творчай біяграфіі – пакуль яшчэ невялікай, аднак ужо даволі яскравай – удзел у якасці спявачкі ў раённых мерапрыемствах, а таксама музычных конкурсах розных узроўняў. Напрыклад, у сёлетнім кастрычніку спявачка прымала ўдзел у II адкрытым музычным конкурсе “Ступені творчасці”, які наладжваецца ў Мінску беларускім саюзам кампазітараў. У намінацыі “Вакальная творчасць. Салісты. Акадэмічны вакал” Анастасія стала лаўрэатам I ступені. Дыплом і кубак “Ступені творчасці-2020” юнай кіраўчанцы ўручыў заслужаны дзеяч культуры, народны артыст Беларусі, музыкант і кампазітар Эдуард Ханок.

Падчас удзелу ў творчым іспыце дзяўчынку падтрымлівалі яе выкладчыца па музычных дысцыплінах Святлана Шакарава, канцэртмайстар дзіцячай школы мастацтваў Дзмітрый Барэйша і, вядома ж, бацькі.
“Насця займаецца ў дзіцячай школе мастацтваў з 5 гадоў, – расказвае матуля нашай гераіні Вікторыя. – З маленства яна любіла музыку, спявала заўсёды і ўсюды! У нашай сям’і няма прафесійных музыкаў і спевакоў. Муж любіць пець, у мяне таксама нядрэнны голас. Аднак, мы запрыкмецілі, што наша дачка цягнецца да свету музыкі, ёй гэта падабаецца, таму вырашылі падтрымліваць і развіваць дзіцячы інтарэс. З музычных інструментаў яна асвойвае фартэпіяна, а спяваць любіць усё: і эстрадныя, і народныя, і акадэмічныя творы”.
Заняткі ў музычнай школе Анастасія Зайцава сумяшчае з вучобай у 3 класе СШ №2 імя К.П.Арлоўскага, асабліва любіць урокі матэматыкі і англійскай мовы. Як любая дзяўчынка, яна марыць вырасці сапраўднай прыгажуняй, таму наведвае аб’яднанне па інтарэсах “Імідж” узорнай студыі юнага мадэльера “Жамчужына” Цэнтра дадатковай адукацыі дзяцей і моладзі.
Бацькі дзяўчынкі прыкладваюць шмат намаганняў, каб падтрымліваць яе інтарэс да музычнай творчасці і развіваць патэнцыял: “Мы з мужам дапамагаем Насцюшы знаходзіць цікавыя песні для выканання, ра­зам разбіраем п’есы на фартэпіяна, – працягвае расказваць Вікторыя. – Быць бацькамі таленавітага дзіцяці няпроста. Патрэбна шмат часу, каб дадаткова займацца з дачкой, вазіць яе на шматлікія рэпетыцыі, заняткі. Асаблівая тэма – падбор канцэртных нарадаў: сукенкі, туфлі, упрыгожванні, заколкі, прычоскі…
Хочацца падзякаваць педагогу школы мастацтваў Святлане Шакаравай за важкую дапамогу, яна ставіцца да Насці, як да роднага дзіцяці, не толькі адкрывае ёй чароўны свет музыкі, але і падтрымлівае, дае слушныя парады, клапоціцца”.
Першым творчым іспытам, у якім Анастасія Зайцава прымала ўдзел, быў школьны этап конкурсу “Мы гукамі размалюем свет”, у 2019 годзе, дзе яна атрымала Дыплом I ступені. У тым жа годзе ў Бабруйску праходзіў адкрыты фестываль-конкурс вакальна-харавой творчасці “У кожнай песні – сонейка”, дзе юная спявачка ўзнагаро­джана Дыпломам I ступені ў намінацыі “Акадэмічны вакал” і Дыпломам “Яскравы старт”. У сёлетнім маі сям’я Зайцавых запісала відэавыступленне Насці, якое прымала ўдзел у рэгіянальным конкурсе дзіцячай вакальна-харавой творчасці “Выдатныя даты выдатных людзей”, у намінацыі “Сольны спеў” кіраўчанка ўзнагаро­джана Дыпломам лаўрэата III ступені. У кастрычніку бягучага года таленавітая дзяўчынка ўдзельнічала ў пятым нацыянальным конкурсе мастацтваў “Аранжавы настрой”, які праходзіў у Магілёве, дзе атрымала Дыплом
I ступені і медаль.
Анастасія – старэйшая дачка Яўгена і Вікторыі Зайцавых. Яна – прыклад для сваіх малодшых сястрычак 5-гадовай Машы і 3-гадовай Арышы.
Бацькі вельмі ўважліва ставяцца да іх выхавання і з маленства стараюцца прыкмячаць здольнасці сваіх дачок. Напрыклад, Марыя любіць танцаваць,
а Арына пакуль не вызначылася з інта­рэсамі: яна і спявае разам са старэйшай сястрой, і танцуе разам з сярэдняй.
Разважаючы над тэмай развіцця дзіцячых інтарэсаў, Вікторыя адзначыла: “Я лічу, што самае галоўнае, любіць сваіх дзяцей, шчыра і бескарысліва. Не шкадаваць часу, каб паразмаўляць з імі, пацікавіцца іх справамі, пагуляць у якую-небудзь гульню, пачытаць казкі. Адным словам, больш часу праводзіць разам з усёй сям’ёй. Мне здаецца, нельга спрабаваць праз сына ці дачку рэалізаваць свае мары, якія не спраў­дзіліся. Кожнае дзіцяці – асаблівае, непадобнае, са сваімі талентамі і здольнасцямі, варта толькі не палянавацца іх запрыкмеціць, а потым дапамагаць ім развівацца, падтрымліваць. А, наогул, важна, каб дзеці раслі ў шчаслівых сем’ях. Шчасце – гэта калі родныя і блізкія вам людзі здаровыя, дома пануе спакой, а ў душы – цеплыня. Няхай так будзе ў кожнага! У гэтым і ўтрымліваецца сакрэт усіх поспехаў”.
Яўгенія БЯЛЬКО.
Фота – з архіва сям’і Зайцавых.