Трактарыст-машыніст з Кіраўскага РАПТЗ удастоены медаля “За працоўныя заслугі”
На пасяджэнні Магілёўскага аблвыканкама па кадравай палітыцы ў рэгіёне з удзелам намесніка Прэм’ер-міністра Леаніда Зайца, міністра працы і сацыяльнай абароны Ірыны Касцевіч, памочніка Прэзідэнта – інспектара па Магілёўскай вобласці Леаніда Мартынюка, кіраўніцтва вобласці ўчора адбылося ўзнагароджванне перадавікоў АПК дзяржаўнымі ўзнагародамі. За шматгадовую плённую працу, значны асабісты ўклад у развіццё АПК, дасягненне высокіх вытворчых паказчыкаў медаля “За працоўныя заслугі” ўдастоены вадзіцель пагрузчыка Кіраўскага райаграпрамтэхзабеспячэння Андрэй Хлапкоў.
– Працую ў арганізацыі з 1992 года. Свае абавязкі стараюся выконваць добрасумленна, а калі шануеш і любіш сваю працу, то і рабіць гэта няцяжка, – дзеліцца ўражаннямі Андрэй Іванавіч. – Атрымаць такую ўзнагароду для мяне вельмі ганарова. Прыемна, што маю працу, мой асабісты ўклад у развіццё гаспадаркі, нашага раёна так высока ацанілі. Лічу, што ў нас шмат людзей годных медаля «За працоўныя заслугі», таму падзяляю гэтую ўзнагароду з усім калектывам, бо ў адзіночку яе зарабіць складана. Дзякуй усім, хто мае дачыненне да гэтай важнай у маім жыцці падзеі, за аказаны давер, буду старацца і надалей апраўдваць яго. Наогул жа, як умею так і працую…