У спартыўным комплексе “Мінск-Арэна” прайшла рэспубліканская Спартакіяда па веласпорце на трэку сярод дзіцяча-юнацкіх спартыўных школ. Яна традыцыйна лічыцца адным з важнейшых, рэйтынгавых спаборніцтваў, бо менавіта тут выяўляецца ўзровень падрыхтаванасці юных спартсменаў і, адпаведна, ацэньваецца работа аддзяленняў веласпорту спартшкол.
Забягаючы наперад, адзначым, што экзамен прадстаўнікі Кіраўшчыны здалі на высокім узроўні, заваяваўшы ў камандным заліку “бронзу” сярод 20 каманд з удзелам 119 веласіпедыстаў. Першыя дзве пазіцыі кіраўчане саступілі толькі мацнейшым на сённяшні дзень зборным Мінска і Брэста, у якіх куды больш магчымасцей адточваць майстэрства на трэку.
У саставе каманды Кіраўскай ДЮСШ выступала 8 чалавек: па 4 юнакі і дзяўчыны адпаведна. Асабліва ўдала змаглі выступіць прадстаўніцы цудоўнай паловы чалавецтва — Ганна Васількова, Марыя Зайцава, Вікторыя Рудакова і Ангеліна Шчарбакова, якія здабылі для каманды значную колькасць ачкоў у розных гонках за 4 дні спаборніцтваў.
У каманднай гонцы праследвання наша чацвёрка заняла 2 месца, саступіўшы толькі Мінску. Трэцяй кіраўская зборная была ў камандным спрынце. Шчыльныя “ачковыя” рэзультаты кіраўчанкі паказалі ў спрынце, дзе Ганна Васількова, Марыя Зайцава і Вікторыя Рудакова фінішавалі адпаведна на 4-й, 5-й і 7-й пазіцыях; індывідуальнай гонцы праследвання на 2 км, у якой Ангеліна Шчарбакова ўзяла “бронзу”, а Ганна Васількова, Марыя Зайцава і Вікторыя Рудаковы былі адпаведна 4-й, 5-й і 7-й. Ганна Васількова наогул у дзвюх гонках бліснула: у групавой па ачках і гонцы з выбываннем яна стала пераможцай! А ў гіце на 500 м ёй толькі крыху не хапіла да “бронзы”.
Добрыя вынікі паказалі і нашы юнакі: Максім Лёгкі, Алег Новік, Арцём Несцярэнка і Яраслаў Грудзінін. І хоць у вельмі канкурэнтнай барацьбе хлопцам не ўдалося трапіць на прызавыя месцы, важкі заліковы багаж яны дадалі ў агульную камандную скарбонку — літаральна ў кожнай гонцы кіраўчане траплялі ў 10-кі мацнейшых.