У Магілёве прайшла абласная спартакіяда па шашках з удзелам школьнікаў 2005 гадоў нараджэння і маладзей. У камандным заліку зборная каманда Кіраўшчыны заняла 2-е месца, паўтарыўшы поспех мінулага года.

За званне мацнейшых змагаліся 20 каманд з раённых цэнтраў, а таксама Магілёва і Бабруйска. За шашачнымі дошкамі сустракаліся 92 ўдзельнікі спартакіяды. Кожную каманду прадстаўлялі па 3 хлопчыкі і па адной дзяўчынцы. У састаў кіраўскай зборнай увайшлі Ілья Лебедзеў, Аляксей Бодык і Анастасія Бялянава з СШ №1 (трэнер Барыс Гаўрыленка) , а таксама вучань Чыгірынскай СШ Уладзіслаў Паўлоўскі (трэнер Сяргей Іваніцкі).

У жорсткай канкурэнцыі нашы юныя шашысты ў чарговы раз прадэманстравалі высокі ўзровень падрыхтоўкі і ў камандным заліку, як і летась, занялі 2-е месца, прапусціўшы наперад толькі традыцыйных фаварытаў — бабруйчан.

Ёсць у нас прызёры і ў асабістым заліку. Другі год запар сярэбраным прызёрам стаў Ілья Лебедзеў. “Падрос” у параўнанні з мінулым годам і Аляксей Бодык: летась ен не змог увайсці ў тройку лепшых, а зараз заваяваў “бронзу” .

Абодва нашы названыя вышэй шашысты ўключаны ў састаў кандыдатаў у зборную Магілёўскай вобласці, якой прадстаіць змагацца на рэспубліканскім узроўні.