І вучоба, і практыка
Як вядома, найлепшае замацаванне атрыманых тэарэтычных ведаў — практычная дзейнасць. Адносна навучэнцаў ліцэя №15 гэта работа на палетках вучэбнай гаспадаркі. Тут вырошчвацца шырокі спектр агароднінных культур, а з нядаўняга часу “фірменнай” сярод іх для навучальнай установы стаў азімы часнок. Сёлета ён вырошчваўся на плошчы 2 га, сабрана 2,5 т духмяных галовак.
Акрамя таго, ураджай палёў вучэбнай гаспадаркі склаў: 30 т цыбулі, 35 т морквы і буракоў, 50 т капусты, 130 т бульбы, 26 т грэчкі. Дарэчы, апошняя культура ўжо абрушана прамысловым спосабам, і неўзабаве, як запэўнілі ў навучальнай установе, крупы паступяць у продаж, прычым, па цане ніжэй за рыначную.
Варта адзначыць, што ўвесь асартымент вырошчваемых ліцэістамі культур быў прадстаўлены на праводзімых традыцыйных восеньскіх кірмашах. Набыць залацістую цыбульку, хрумсткую капусту і іншую агародніну, сабраную працавітымі рукамі навучэнцка-выкладчыцкага калектыву ліцэя №15 на чале з яго дырэктарам В.С.Панушковым, мелі магчымасць кіраўчане, жыхары Бабруйска і Магілёва.
Частка вырашчанага рэалізавана, частка ўжо зараз выкарыстоўваецца для ўласных патрэб, у прыватнасці, для патаннення абедаў навучэнцаў, а частка закладваецца на працяглае захоўванне. Аб’ектыў рэдакцыйнай фотакамеры якраз і заспеў гэты момант: вядзецца пераборка цыбулі ў агароднінасхові-шчы і бульбы на гаспадарчым двары навучальнай установы. У гэтых работах, як і іншых на працягу ўсяго сельскагаспадарчага года, задзейнічаны ўвесь калектыў ліцэя: навучэнцы, выкладчыкі, майстры вытворчага навучання, тэхработнікі. Усё падпарадкавана адзінай мэце: замацаванне атрыманых тэарэтычных ведаў на практыцы і атрыманне рэальнага прыбытку ад гаспадарчай дзейнасці.
Таццяна МАІСЕЕНКА.
Фота
Максіма МІКЕШЫНА.