“Залатая восень” у “золаце” дыпломаў

Той, хто не прыехаў на чарговае свята здароўя ў раёне, няхай пашкадуе! На гэтым спартыўным мерапрыемстве было цікава і для яго ўдзельнікаў, і для балельшчыкаў. Лёгкаатлетычны крос, арганізаваны аддзелам фізічнай культуры, спорту і турызму райвыканкама і спартыўным клубам раёна, праходзіў даволі нестандартна і запамінальна — на перасечанай мясцоваці, а, дакладней, у селіцкім парку райцэнтра. А прысвячаліся спаборніцтвы Дню работнікаў сельскай гаспадаркі і перапрацоўчай прамысловасці АПК, які будзе адзначацца ў бліжэйшыя выхадныя. Адпаведна і для ўдзелу ў кросе былі запрошаны ўсе сельскагаспадарчыя прадпрыемствы раёна, а таксама ўстановы, якія “куюць” кадры для аграпрамысловага комплексу: Жыліцкі сельгаскаледж і ліцэй №15.
Удзельнікаў, на жаль, сабралася няшмат — толькі 5 каманд. Але спаборнічалі яны заўзята і паказалі дастойныя рэзультаты. А, галоўнае, самі атрымалі значную дозу адрэналіну і прыўзнятага настрою.
Першымі “асвойваць” імправізаваную трасу адправіліся жанчыны. Паколькі ўзрост удзельніц быў розны, то рэзультаты забегу былі падведзены з улікам каэфіцыентаў. Пераможцай стала Вера Гаўрылава з каманды СВК “Рассвет” імя К.П.Арлоўскага. Адзначым, што яна, дырэктар Мышкавіцкай СШ, нягледзячы на занятасць, заўсёды знаходзіць час для заняткаў спортам і ўдзелу ў розных спаборніцтвах. Другое месца заваявала Аліна Круглік з Жыліцкага сельгаскаледжа. Замкнула тройку прызёраў прадстаўніца зборнай СВК “Калгас “Беларусь” Надзея Заварніцына.
Мужчыны спрачаліся ў трох узроставых катэгорыях, і дыстанцыя ў іх была ўдвая большай, чым у жанчын. Сярод 18-29-гадовых спартсменаў перамог рассветавец Аляксей Бычкоў. Другім стаў прадстаўнік каледжа Уладзімір Юдзін, трэцяе месца дасталося Аляксандру Гіраеўскаму з РАПТЗ. Ва ўзроставай катэгорыі 30-39 гадоў першым на фінішы быў зноў прадстаўнік “Рассвета” Яўген Пішчалін. На другую прыступку п’едэстала гонару ўзняўся Міхаіл Міхайлюк з Жыліч і трэцім стаў Уладзімір Самусеў з каманды ліцэя. Былі на спаборніцтвах і аматары лёгкай атлетыкі узростам у 50 гадоў і старэй. Перамог сярод іх жылічанін Уладзімір Пракопчык. Другім стаў Анатоль Рышкевіч з каманды СВК “Калгас “Беларусь”. Трэці вынік паказаў адзін з рассветаўскіх авіятараў Уладзімір Няхаеў.
Быў таксама названы і абсалютны пераможца, які паказаў найлепшы вынік з улікам усіх узростаў. Ім стаў пастаянны ўдзельнік разнастайных раённых і абласных спаборніцтваў Андрэй Бяляўскі з каманды “Рассвета”.
Зыходзячы з асабістых рэзультатаў, няцяжка здагадацца, што агульнакамандную перамогу святкавалі рассветаўцы. Другое месца па праву заваяваялі прадстаўнікі Жыліцкага сельгаскаледжа, трэцяе месца — ліцэй №15. Пераможцам і прызёрам былі ўручаны дыпломы, а каманда-пераможца атрымала яшчэ і прыз.
Аляксандр ХАХЛОЎ.
Фота аўтара.

Добавить комментарий

Ваш адрес email не будет опубликован.