Ветэрынарнае абслугоўванне праводзіць ветурач

У рэдакцыю “Кіраўца” прыйшоў паштовы ліст ад групы жыхароў некалькіх населеных пунктаў раёна — Жылічы, Няптун, Капачоўка, Пархімкавічы. Вяскоўцы расказалі: “Да нядаўняга часу ветфельчар Алена Сідарэнка абслугоўвала нашы пасёлкі: прывозіла лякарствы для жывёлы, птушак, рабіла ім неабходныя прышчэпкі, давала гаспадарам кансультацыі па ветэрынарных пытаннях. Зараз працоўную адзінку — 1/4 стаўкі, на якой была Алена Сідарэнка, скарацілі. Цяпер за лякарствамі нам трэба ездзіць самім у Кіраўск. Не ведаем, што рабіць, калі нашым жывёлам патрабуецца экстраная ветэрынарная дапамога… Просім расказаць, хто зараз са спецыялістаў будзе клапаціцца аб нашай жывёле і птушках, аказваць ветэрынарныя паслугі на тэрыторыі нашых пасёлкаў”.
За адказамі на пытанні вяскоўцаў “раёнка” звярнулася да галоўнага ветэрынарнага ўрача раёна Мікалая Маслава. Вось што ён паведаміў: “На падставе Пастановы Міністэрства працы Рэспублікі Беларусь ад 28 мая 1999 года №69 і Пастановы Савета Міністраў Рэспублікі Беларусь ад 14 красавіка 2003 года №493 ветэрынарныя ўрачы прадпрыемстваў незалежна ад ведамаснай падначаленасці абавязаны наладжваць і праводзіць у абслугоўваемых імі гаспадарках, населеных пунктах, якія ўваходзяць у састаў гаспадарак, прафілактычныя, дыягнастычныя ветэрынарна-санітарныя мерапрыемствы, а ў выпадку захворвання праводзіць неабходнае лячэнне.
Усе лячэбна-прафілактычныя ветэрынарна-санітарныя мерапрыемствы жывёле і птушкам, якія знаходзяцца ў асабістай маёмасці насельніцтва, наладжвае і забяспечвае іх выкананне галоўны ветэрынарны ўрач сельгаспрадпрыемства.
У цяперашні час ветэрынарнае абслугоўванне на тэрыторыі населеных пунктаў Жылічы, Няптун, Капачоўка, Пархімкавічы наладжвае галоўны ветурач РУП “Жылічы” Г.М. Шлапакоў сумесна з ветэрынарнымі спецыялістамі гэтага сельгаспрадпрыемства.
Згодна пісьма Магілёўскага абласнога выканаўчага камітэта №470/113 ад 25 ліпеня 2011 г. у сувязі са стварэннем дзяржаўнай установы “Ветнагляд” была скарочана адзінка ветэрынарнага фельчара, на якой працавала Алена Сідарэнка”.

Добавить комментарий

Ваш адрес email не будет опубликован.