Дастойная гісторыя, яркія перспектывы

Урачысты сход, прысвечаны 75-годдзю з дня ўтварэння Магілёўскай вобласці, прайшоў у мінулую суботу ў Палацы культуры вобласці. У ім прынялі ўдзел дэлегацыі ўсіх раёнаў Прыдняпроўскага краю, у якія ўвайшлі лепшыя прадстаўнікі рэгіёнаў — перадавікі вытворчасці, ветэраны вайны і працы, спорту, пераможцы творчых конкурсаў, прадстаўнікі грамадскіх арганізацый, моладзь.
Ва ўрачыстасцях прымала ўдзел і дэлегацыя Кіраўшчыны на чале са старшынёй райвыканкама Уладзімірам Піскіжавым. У саставе нашай дэлегацыі была член Савета Рэспублікі Нацыянальнага сходу Рэспублікі Беларусь, галоўны ўрач Кіраўскай райбальніцы Алена Круцько.
Прысутных у зале Палаца вобласці шчыра вітаў першы намеснік кіраўніка Адміністрацыі Прэзідэнта Рэспублікі Беларусь Аляксандр Радзькоў. Ён зачытаў віншаванне Кіраўніка нашай дзяржавы Аляксандра Рыгоравіча Лукашэнкі жыхарам Магілёўшчыны з нагоды 75-годдзя з дня ўтварэння вобласці. “Беларускае Пры-дняпроўе, — адзначана ў віншаванні, — гэта край з багацейшымі гісторыяй, культурнай спадчынай і традыцыямі. Дастойна вытрымаўшы цяжкія вы-прабаванні Вялікай Айчыннай вайны і катастрофы на Чарнобыльскай АЭС, ваш рэгіён адрадзіўся і паспяхова развіваецца.
Сёння Магілёўшчына валодае значным вытворчым, інтэлектуальным, інвестыцыйным патэнцыялам і ўносіць істотны ўклад ва ўмацаванне айчыннай эканомікі, развіццё навукова-тэхнічнага прагрэсу, адукацыі і культуры.
Усё гэта стала вынікам працы некалькіх пакаленняў вашых землякоў. Менавіта яны, таленавітыя, адукаваныя, дзейныя і прадпрымальныя людзі, з’яўляюцца галоўным дастаяннем вобласці.
Упэўнены, што слаўныя традыцыі вашага шчодрага і хлебасольнага рэгіёна будуць дастойна працягвацца, і магіляўчане ўпішуць нямала новых старонак у гісторыю сваёй малой радзімы і ўсёй Беларусі.
Моцнага здароўя вам, шчасця, дабрабыту і дабра!”
Ад імя Урада краіны віншаванні з нагоды юбілею вобласці выказаў намеснік прэм’ер-міністра Рэспублікі Беларусь Міхаіл Русы. Па даручэнні прэм’ер-міністра краіны Міхаіла Мясніковіча ён уручыў прывітальны адрас старшыні Магілёўскага аблвыканкама Пятру Рудніку.
Губернатар вобласці звярнуўся з прамовай да ўдзельнікаў урачыстага мерапрыемства. Ён адзначыў, што Магілёўшчына — адзін з самых маляўнічых куткоў Беларусі. Распрасцёрты ўздоўж берагоў вялікага Дняпра, на трэць пакрыты багатымі лясамі, гэты край мае багацейшую гісторыю і па праву завецца Прыдняпроўскім.
Пётр Руднік нагадаў старонкі гісторыі краю, яго гераічнага і ў многім трагічнага лёсу. Нашым продкам, заўважыў ён, часта даводзілася са зброяй у руках абараняць родную зямлю, і яны, якія б нягоды ні былі на іх шляху, выстаялі і загартаваліся.
75 год назад пасля рашэння першай сесіі Вярхоўнага Савета СССР аб утварэнні Магілёўскай вобласці пачаўся адлік сучаснай гісторыі Прыдняпроўскага краю.
За ратныя і працоўныя подзвігі наша Магілёў-шчына ўзнагароджана ордэнам Леніна, горад Магілёў — ордэнам Айчыннай вайны першай ступені, горад Бабруйск — ордэнам Працоўнага Чырвонага Сцяга, гарады Клічаў, Крычаў, Бабруйск і Магілёў удастоены яшчэ адной высокай узнагароды: па Указу Прэзідэнта Рэспублікі Беларусь Аляксандра Лукашэнкі гэтым гарадам уручаны вымпел “За мужнасць і стойкасць у гады Вялікай Айчыннай вайны”.
У 1994 годзе, які стаў годам увядзення ў нашай краіне інстытута прэзідэнцтва, пачаўся этап навейшай гісторыі Магілёўскай вобласці. “З гэтага моманту, — заўважыў у сваёй прамове Пётр Руднік, — наша краіна і рэгіён выйшлі на новы этап сацыяльна-эканамічнага развіцця. Асноватворчым прыярытэтам дзяржаўнай палітыкі стаў чалавек з яго надзённымі праблемамі, жаданнем дастойна жыць і будаваць справядлівае грамадства. І мы ганарымся тым, што гэты прыярытэт быў увасоблены ў жыццё нашым земляком, першым Прэзідэнтам Рэспублікі Беларусь Аляксандрам Рыгоравічам Лукашэнкам.”
За апошняе дзесяцігоддзе вобласць выйшла на прынцыпова новыя рубяжы развіцця. І сёння ардэнаносная Магілёўшчына — гэта рэгіён, які дынамічна развіваецца, валодае магутнейшым індустрыяльным і сельскагаспадарчым патэнцыялам.
Пётр Руднік назваў прыярытэтныя напрамкі развіцця галін народнагаспадарчага комплексу, дасягненні працаўнікоў Прыдняпроўскага краю.
Асаблівы акцэнт губернатар зрабіў на поспехах маладых прадстаўнікоў Магілёўшчыны — будучыні рэгіёна і нашай краіны.
Шчырыя словы ўдзячнасці прагучалі ў адрас ветэранаў вайны і працы, кіраўнікоў, якія ў розныя гады ўзначальвалі вобласць і чыімі намаганнямі закладваўся трывалы фундамент сённяшняга дабрабыту Прыдняпроўскага краю.
Старшыня аблвыканкама выказаў удзячнасць усім жыхарам Магілёўшчыны за добрасумленную, самаадданую працу, значны ўклад у развіццё вобласці, народжанай у дваццатым стагоддзі і жывучай трэцім тысячагоддзем.
Па добрай традыцыі, падчас урачыстасцей былі ўшанаваны заслужаныя людзі рэгіёна. Пётр Руднік уручыў спецыяльныя прэміі аблвыканкама “Чалавек года” па выніках 2012 года і Ганаровыя граматы аблвыканкама.
“Кожны з вас стараўся ставіцца да сваёй справы з душой, выконваў сваю работу добрасумленна, вынікова і самааддана, — адзначыў старшыня аблвыканкама. — Я спадзяюся, што і ў далейшым сваёй добрасумленнай працай вы будзеце актыўна ўдзельнічаць у развіцці роднага краю, у эканамічным і духоўным аздараўленні нашага грамадства”.
У гэты дзень жыхары Магілёўшчыны прымалі віншаванні ад усіх абласцей Беларусі, краін СНД.
На ўрачыстым пасяджэнні Магілёву быў уручаны сертыфікат “Магілёў — культурная сталіца краін СНД і Рэспублікі Беларусь”.
Як адзначыў міністр культуры Барыс Святлоў падчас цырымоніі ўручэння, магілёўская зямля багатая сваёй гісторыяй і культурнай спадчынай, якой ганарацца мясцовыя людзі, і выказаў упэўненасць, што новы статус стане яшчэ адной цаглінкай для ўмацавання іх любові да роднага горада. “Сумеснымі намаганнямі мы зможам зрабіць у гэтым годзе жыццё горада на Дняпры больш змястоўным і разнастайным, прыцягнуць сюды новыя патокі гасцей і турыстаў. Няхай вынікі гэтага насычанага на культурныя мерапрыемствы года стануць своеасаблівым фундаментам для далейшага развіцця культуры Магілёўшчыны, адкрыюць для рэгіёна новыя гарызонты і перспектывы”, — пажадаў Барыс Святлоў.
Вельмі маштабнай і маляўнічай была святочная канцэртная праграма, у якой прынялі ўдзел знакамітыя калектывы мастацкай самадзейнасці рэгіёна, папулярныя эстрадныя спевакі — выхадцы з Магілёўшчыны: заслужаныя артысткі Рэспублікі Беларусь Іна Афанасьева, Ірына Дарафеева, Алёна Ланская, а таксама Пётр Ялфімаў, Іскуі Абалян, Іван Буслай і іншыя.
Для гасцей была падрыхтавана выстава дасягненняў народнагаспадарчага комплексу Магілёўшчыны, у якой бачнае месца займала экспазіцыя СВК “Рассвет” імя К.П.Арлоўскага.
Пасля ўрачыстасцей дэлегацыі рэгіёнаў былі запрошаны на буйныя прадпрыемствы Магілёва, дзе падчас экскурсій увачавідкі пераканаліся ў маштабах дасягненняў прамысловага сектара абласной сталіцы.
Кіраўская дэлегацыя пабывала на ААТ “Строммашына”, якое сёлета адзначае свой 100-гадовы юбілей, дзе даведалася аб слаўнай гісторыі прадпрыемства і яго сённяшнім дні.
…Вобласць пачала адлічваць 76-ю старонку сваёй гісторыі. Шчасця і працвітання табе, родная Магілёўшчына!
Наталля ХАДАКОВА.
Фота аўтара,
Максіма МІКЕШЫНА

Добавить комментарий

Ваш адрес email не будет опубликован.