«Ідзі, мой сябар, ідзі заўсёды дарогай дабрыні…»

Гэтыя словы песні з к/ф “Маленькі Мук” можна назваць своеасаблівым дэвізам традыцыйных “Калядных сустрэч сяброў” з удзелам інвалідаў, якія трэці год запар наладжвае Кіраўскі раённы цэнтр сацыяльнага абслугоўвання насельніцтва. Спонсарамі калядных сустрэч выступаюць раённыя арганізацыі грамадскіх аб’яднанняў “Беларускі фонд міру” і “Белая Русь”, Кіраўскія аддзяленні ААТ “ААБ “Беларусбанк” і “Белаграпрамбанк”, індывідуальны прадпрымальнік Васіль Бацян і ПУГП “ЮЛІД-гандаль”.
Сёлета, дарэчы, як і ў папярэднія гады, калядны фестываль сяброў, як называюць мерапрыемства самі ўдзельнікі, вылучаў масу станоўчых эмоцый, дабрыні, душэўнай цеплыні і радасці. Прадэманстраваць творчыя здольнасці і таленты, падзяліцца з акружаючымі дабрынёй і падарыць ім шчырыя ўсмешкі ў цэнтры дадатковай адукацыі дзяцей і моладзі сабраліся каманды з ліку наведвальнікаў аддзяленняў дзённага знаходжання інвалідаў цэнтраў сацабслугоўвання насельніцтва: Першамайскага раёна г.Бабруйска — “Калейдаскоп”, Ленінскага раёна г.Бабруйска — “Ліманад”, Бабруйскага раёна — “Канфеці ад пяці”, Клічаўскага раёна — “Клічаўскія зорачкі”, Магілёўскага раёна — “Запальнічкі” і Кіраўскага раёна — “Дыскатэка “Аварыя”.
З прывітаннем да ўдзельнікаў і гасцей фестывалю звярнуўся старшыня райвыканкама Уладзімір Піскіжаў. Ён адзначыў, што работа гурткоў і аб’яднанняў па інтарэсах на базах аддзяленняў дзённага знаходжання для інвалідаў мае вялікае значэнне для людзей з абмежаванымі магчымасцямі. Заняткі ў іх дапамагаюць не зачыніцца ў сабе, усвядоміць, што кожны з іх — частка нашага грамадства, а таксама атрымаць навыкі сацыялізацыі. “Сувеніры і вырабы, зробленыя рукамі гэтых маладых людзей, зачароўваюць і заслугоўваюць высокай адзнакі, — сказаў Уладзімір Уладзіміравіч. — Уражвае ўседлівасць і цярплівасць, настойлівасць тых, хто займаецца бісерапляценнем, саломкай і іншымі відамі дэкаратыўна-прыкладнога мастацтва”. Кіраўнік раёна пажадаў, каб фестываль пашыраўся ў маштабах, а кожны з яго ўдзельнікаў знайшоў сваё месца ў жыцці, не страціў веру ў сябе і сустрэў сапраўдных сяброў, якія заўсёды будуць гатовы падставіць надзейнае плячо падтрымкі.
З прывітальным словам таксама звярнулася член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько: “Жадаю, каб вы заўсёды былі бадзёрымі і вясёлымі, часцей усміхаліся, мелі жыццёвыя мэты і пастаянна рухаліся да іх здзяйснення. Сацработнікам жадаю ўдачы ў высакароднай справе — лячыць людскія душы, весці іх да свету, каб яны не згубіліся ў жыцці”.
Затым быў дадзены старт конкурсна-забаўляльнай праграме. На першым этапе — “Навагоднія зорачкі” каманды ў якасці прывітання дэманстравалі музычныя нумары. Кіраўчане падрыхтавалі тэатралізаваны кліп аб тым, як тры гномы ўкралі прыгажуню і даглядаюць яе. Вясёлыя дзяўчыны з каманды Бабруйскага раёна прывезлі на фестываль вясёлыя прыпеўкі. “Клічаўскія зорачкі” выканалі песню “Дарогай дабрыні”, а ўдзельнікі каманды “Ліманад” падрыхтавалі заўзяты танец “Навагодні рок-н-ролл”, магіляўчане прывезлі з сабой танец разбойнікаў. Самым чуллівым стала выступленне Марыны Пепяляевай з каманды Першамайскага раёна г.Бабруйска: дзяўчына выканала песню эстраднай спявачкі Максім “Знаешь ли ты”.
На конкурс майстэрства — “Навагодняя ёлка” рабяты прадастаўлялі ёлачкі, зробленыя з розных матэрыялаў, у тым ліку і незвычайных. Былі дэкаратыўныя дрэўцы з ватных дыскаў, газет, цукерак і полімернай гліны, бісера і макаронаў.
На наступным этапе — “Навагодні стол” вызначалі лепшых кулінараў фестывалю. Каманда “Ліманад” прадаставіла на суд журы салат “Свечка”, “Клічаўскія зорачкі” парадавалі напіткам “Бадзёрасць”, “Дыскатэка “Аварыя” прыгатавала “Пірог шчасця”, а “Запальнічкі” — торт “Ёжык”, каманды “Канфеці ад пяці” і “Калейдаскоп” прывезлі на фестываль торт з зефіру і пернікавы домік.
Фантазіяй і неардынарнымі задумамі вылучыўся конкурс “Навагодняя казка”, па ўмовах якога каманды павінны былі паказаць невялікае тэатралізаванае прадстаўленне. Удзельнікі з Бабруйскага раёна расказалі гісторыю «Как-то раз, на Рождество девушки гадали…» — нагадалі сабе жаніха — Дзеда Мароза, а затым яго дзялілі. Рабяты з ЦСАН Першамайскага раёна прадэманстравалі паказ моднага адзення “Мары аб вясне”. “Клічаўскія зорачкі” разыгралі сцэнку “Церамок”, а “Дыскатэка “Аварыя” — “Вечар на хутары паблізу Кіраўска”. Магілёўскія “Запальнічкі” паказалі гледачам, як збіраліся на “Калядныя сустрэчы сяброў” у Кіраўск. Дастаткова цікавым аказаўся падыход да творчага конкурсу ў каманды ЦСАН Ленінскага раёна: яны разыгралі “Легенду аб каляднай Ёлачцы”.
Як адзначыла галоўны спецыяліст сацыяльнай дапамогі і сацыяльнага абслугоўвання Камітэта па працы, занятасці і сацыяльным абслугоўванні Магілёўскага аблвыканкама Марына Максімава, “вызначыць пераможцаў было складана. Бо ўсе выступілі дастойна, стараліся выкладвацца па максімуму. Відавочна, што ў камандах панавала сяброўства, падтрымка і вялізная павага адзін да аднаго”.
Па выніках конкурсна-забаўляльнай праграмы кожная каманда атрымала прызы і дыпломы фестывалю: ЦСАН Першамайскага раёна — “Самыя артыстычныя”, ЦСАН Ленінскага раёна перамог у намінацыі “Навагодняя ёлка”, ЦСАН Бабруйскага раёна — “Самыя пазітыўныя”, ЦСАН Магілёўскага раёна перамаглі ў намінацыі “Навагодні стол”, ЦСАН Клічаўскага раёна лепшы ў намінацыі “Навагоднія зорачкі”, ЦСАН Кіраўскага раёна — у намінацыі “Навагодняя казка”.
Дырэктар ЦБУ №709 г.Кіраўска філіяла №703 ААТ “ААБ Беларусбанк” Алена Лявіцкая асабіста ад сябе ўзнагародзіла падарункамі найбольш спадабаўшыхся ёй удзельнікаў — Марыну Пепяляеву з каманды Першамайскага раёна г.Бабруйска і Дзяніса Садоўнікава з каманды Магілёўскага раёна.
На гэтым фестываль не завяршыўся. На базе цэнтра сацабслугоўвання рабят чакаў святочны стол і запальная дыскатэка.
Яўгенія КАРАНКЕВІЧ.
Фота аўтара
і Максіма МІКЕШЫНА.

Добавить комментарий

Ваш адрес email не будет опубликован.