“Кіраўская лыжня-2013” — да Сусветнага дня снегу!

У мінулыя выхадныя дні Беларусь актыўна далучылася да акцыі “Сусветны дзень снегу”. Паўсюдна прайшлі спаборніцтвы па зімовых відах спорту.
Не засталіся ў баку і кіраўчане. У суботу адбылося традыцыйнае фізкультурна-спартыўнае свята “Кіраўская лыжня”, якое было праведзена ў раёне Селіцкага парка. Галоўнай падзеяй свята сталі спаборніцтвы па лыжных гонках у залік круглагадовай спартакіяды калектываў фізічнай культуры.
Аматараў фізкультуры і спорту, балельшчыкаў не спалохаў калядны мароз, настрой ва ўсіх быў прыўзняты, лыжная траса клікала ставіць высокія рэзультаты!

Абдылося ўрачыстае адкрыццё “Кіраўскай лыжні-2013”. Пад гукі Дзяржаўнага гімна Рэспублікі Беларусь быў узняты Дзяржаўны флаг краіны.
Прысутных шчыра вітаў старшыня райвыканкама Уладзімір Піскіжаў, які, як заўжды, прыбыў, каб прыняць актыўны ўдзел у лыжных гонках.
Кіраўнік раёна адзначыў, што гэта свята, якое аб’ядноўвае не толькі спартсменаў-прафесіяналаў, але і аматараў, насельніцтва горада і раёна. Бягучы год аб’яўлены ў нашай краіне Годам беражлівасці, а па кітайскім (усходнім) календары Год змяі павінен быць адзначаны татальным клопатам кожнага аб сваім здароўі. Таму, падкрэсліў старшыня райвыканкама, гэтае мерапрыемства — добры пачатак такому году.
Уладзімір Піскіжаў прывёў словы Прэзідэнта нашай краіны Аляксандра Лукашэнкі, выказаныя падчас леташняга свята “Мінская лыжня” : “…самае дарагое ў чалавека — гэта здароўе. Але ў сілу таго, што здароўе бясплатна даецца чалавеку, не кожны дбае аб ім. А дарэмна… Паверце, спорт — гэта самы танны сродак, каб захаваць здароўе.”
Старшыня райвыканкама канстатаваў, што ў раёне для таго, каб займацца спортам, ствараюцца неабходныя ўмовы. Перш за ўсё, умацоўваецца матэрыяльна-тэхнічная база ўстаноў, набываецца неабходны інвентар і, зразумела, актыўна праводзяцца спартыўныя спаборніцтвы.
Уладзімір Піскіжаў пажадаў удзельнікам перамог на “Кіраўскай лыжні” і на ўсіх сваіх жыццёвых стартах, а таксама станоўчых эмоцый і добрага настрою!
Паспяхова пераадолець лыжную дыстанцыю стараліся літаральна ўсе, але спаборніцтвы прадугледжваюць размеркаванне месц па рэзультатах. І вось як у адпаведнасці з рашэннем судзейскай калегіі размеркаваліся ва ўзроставых групах сярод мужчын і жанчын месцы з першага па трэцяе: 18-29 год — Васіль Бяляўскі (СВК “Рассвет” імя К.П.Арлоўскага), Дзяніс Кандрацьеў і Сяргей Спірыдонаў (абодва — Стайкаўскі сельвыканкам); Вера Каліноўская (Жыліцкі сельгаскаледж), Алеся Шалянгоўская (“Рассвет”), Інэса Комар (ДЮСШ); 30-39 год — Яўген Пішчалін “”Рассвет”), Сяргей Садоўнікаў (аддзел адукацыі райвыканкама), Сяргей Лыбзікаў (РАУС); Алена Дрозд (ДЮСШ), Алена Шалыгіна (аддзел адукацыі), Вольга Макаронак (Жыліцкі сельгаскаледж); 40-49 год — Андрэй Бяляўскі (“Рассвет”), Юрый Шапоткін (райспажыўтаварыства), Віталь Тарасюк (СВК “Добасна-агра”); Вера Гаўрылава (“Рассвет”), Людміла Юхноў-ская (аддзел адукацыі), Ганна Пуцята (Стайкаўскі сельвыканкам); 50-54 года — Пётр Багамолаў (СВК “Калгас “Ніва”), Мікалай Галавач (ДЮСШ); Галіна Шаўцова (Стайкаўскі сельвыканкам); 55 год і старэй — Уладзімір Пракопчык (Жыліцкі сельгаскаледж), Уладзімір Цішкоў (СВК “Добасна-агра”), Міхаіл Бондараў (РВЭС); Кацярына Яскевіч (“Рассвет”).
Асобны забег быў прызначаны для кіраўнікоў. У сваіх узроставых групах добрыя вынікі паказалі: сярод мужчын —старшыня райвыканкама Уладзімір Піскіжаў, начальнік райінспекцыі па насенняводстве, каранціне і абароне раслін Сяргей Лянкевіч, дырэктар райпаліўзбыту Рыгор Дайнека, начальнік РВЭС Аляксандр Ткачоў, намеснік старшыні СВК “Калгас “Ніва” Іван Багамолаў; сярод жанчын — намеснік старшыні райвыканкама Вольга Гаршкова, начальнік РВПС Марына Падаляк.
Камандныя месцы размеркаваліся наступным чынам: першае — СВК “Рассвет” імя К.П.Арлоўскага, другое — Жыліцкі сельгаскаледж, трэцяе — ДЮСШ.
На наступных месцах адпаведна — каманды Стайкаўскага сельвыканкама, аддзела адукацыі райвыканкама, СВК “Калгас “Ніва”, СВК “Добасна-агра”.
Пераможцы былі ўзнагароджаны каштоўнымі прызамі і дыпломамі першай ступені, прызёры — дыпломамі адпаведных ступеней.
Пасля дыстанцыі ўсіх заклікалі пагрэцца да вогнішча, тут удзельнікаў спаборніцтваў частавалі гарачым чаем і смачнай кашай “з пылу, з жару” работнікі ДЮСШ. Працаваў гандаль. А музыкай, спевамі настрой прысутным падтрымлівалі работнікі культуры. Яны ж праводзілі вясёлую забаўляльную праграму з дзецьмі, іх бацькамі і ўсімі, хто завітаў на свята.
Наталля ХАДАКОВА,
Фота Максіма МІКЕШЫНА.

Добавить комментарий

Ваш адрес email не будет опубликован.