Правільна выбраная прафесія — залог поспеху

Складаная і шматгранная служба супрацоўнікаў органаў унутраных спраў, напрамкі іх дзейнасці ахопліваюць практычна ўсе сферы жыцця. Цяжка ўявіць функцыянаванне дзяржаўных органаў, прадпрыемстваў і ўстаноў без работы супрацоўнікаў міліцыі. Свой уклад у ахову грамадскага парадку, прафілактыку і раскрыццё правапарушэнняў і злачынстваў, абарону канстытуцыйных правоў грамадзян уносяць усе службы органаў унутраных спраў. Але заўсёды на асаблівым месцы знахо-дзіцца служба ўчастковых інспектараў міліцыі, менавіта да іх, як правіла, людзі ідуць са сваімі бедамі і радасцямі… Невыпадкова гавораць, што назва пасады “участковый” — ад слова “участие”.

katar

З самага дзяцінства адным з любімых заняткаў Сяргея Катаражука было назіранне за жыццём іншых людзей, магчыма, гэта і паўплывала на яго далейшы выбар сферы дзейнасці: на дадзены момант ён з’яўляецца участковым інспектарам РАУС па Дабаснянскім сельскім Савеце, мае званне старшы лейтэнант міліцыі.
Пасля заканчэння школы Сяргей паступіў у Бабруйскі аграрна-эканамічны каледж. Затым скончыў Беларускую дзяржаўную сельскагаспадарчую акадэмію. Працаваў у нашым раёне ў былым  калгасе імя Дзяржынскага, потым — у СВК “Чырвоны баец”, дзе зарэкамендаваў сябе адказным, добрасумленным і якасна выконваючым сваю справу спецыялістам.
У 2010 годзе, пасля заканчэння Вучэбнага цэнтра МУС РБ па падрыхтоўцы, павышэнні кваліфікацыі і перападрыхтоўцы кадраў органаў унутраных спраў ён прыйшоў на пасаду ўчастковага інспектара міліцыі аддзялення аховы правапарадку і пра-філактыкі міліцыі грамадскай бяспекі аддзела ўнутраных спраў райвыканкама.
Далёка не кожнаму ўчастковаму інспектару ўдаецца знайсці індывідуальны падыход літаральна да кожнага жыхара на сваім участку (у яго са-стаў уваходзяць 28 населеных пунктаў, КСУП “Жылічы”, СВК “Добасна-агра” і сельскагаспадарчы каледж). Бо, як адзначыў С.В.Катаражук, там жывуць не толькі законапаслухмяныя грамадзяне, але і парушальнікі закона, праблемныя сем’і. Менавіта з такім кантынгентам даводзіцца працаваць старшаму лейтэнанту кожны дзень. І калі праца дае вынік, надыходзіць той самы доўгачаканы момант радасці, прыходзіць пачуццё задавальнення і разумення таго, што яго праца неабходная.
Насельніцтва паважае ўчастковага інспектара за ўменне не скарацца цяжкасцям, за гатоўнасць заўсёды, у любы час дня і ночы, прыйсці на дапамогу.
На мерапрыемстве, прысвечаным 90-годдзю службы МУС, шасцёра ўчастковых інспектараў з Магілёўскай вобласці, у тым ліку і Сяргей Катаражук, былі ўзнагароджаны дыпломамі і каштоўнымі падарункамі за адказную службу.
Старшы лейтэнант лічыць, што ў яго рабоце немалаважныя прыстойнасць, веданне законаў, павага да людзей і абарона пацярпелых. Ён ніколькі не сумняваецца ў тым, што выбраў правільную прафесію.
Варта адзначыць, што С.В.Катаражук узнагароджаны знакам “Ганаровы донар”: за 10 гадоў ён здаў 40 данацый крыві! Гэта пахвальна, бо гэта можа выратаваць жыццё якому-небудзь чалавеку, калі яму будзе патрэбна кроў. Вось, напрыклад, нядаўна Сяргею Васільевічу патэлефанавалі і паведамілі, што тэрмінова патрабуецца кроў яго групы, і ён адразу адгукнуўся на просьбу…
У жыцці важна быць не толькі прафесіяналам сваёй справы, але і спагадлівым чалавекам, да якога можна прыйсці ў цяжкую хвіліну за дапамогай. Менавіта такім чалавекам і з’яўляецца ўчастковы інспектар Сяргей Васільевіч Катаражук.
Марыя СМОЖНАЯ.

Добавить комментарий

Ваш адрес email не будет опубликован.