Тэлевізары ў палаты для ветэранаў
У мінулы аўторак у райбальніцы раённай арганізацыяй ГА “Беларускі фонд міру” ў межах 70-годдзя вызвалення Беларусі ад нямецка-фашысцкіх захопнікаў была арганізавана акцыя “Падарунак ветэрану”. А падарункам сталі 4 тэлевізары ў палаты для ветэранаў.
У акцыі прынялі ўдзел намеснік старшыні райвыканкама Галіна Слабоднікава, член Савета Рэспублікі Нацыянальнага сходу Рэспублікі Беларусь, галоўны ўрач ЦРБ Алена Круцько, старшыні раённых арганізацый грамадскіх аб’яднанняў “Беларускі фонд міру” Вольга Гаршкова і “Белая Русь” Васіль Маркевіч.
Як паведаміла Вольга Гаршкова, раённай арганізацыяй Беларускага фонду міру штогод ветэранам вайны і працы, былым вязням аказваецца матэрыяльная дапамога, набываюцца і ўручаюцца сувеніры, наладжваюцца дабрачынныя акцыі.
У гэтым годзе па хадайніцтве галоўнага ўрача ЦРБ Алены Круцько было прынята рашэнне аказаць дапамогу бальніцы. Гэта робіцца не ўпершыню: раней у палаты для ветэранаў раённымі арганізацыямі ГА “Беларускі фонд міру” і “Белая Русь” набываліся тэлевізары і халадзільнікі. Аднак час не стаіць на месцы, тэхніка маральна і фізічна старэе, а з пераходам на лічбавае вя-шчанне паўстала неабходнасць памяняць старыя тэлевізары на больш удасканаленыя. Для таго, каб нашы ветэраны маглі заўсёды быць у курсе апошніх падзей, глядзець навіны, фільмы, праўленнем раённай арганізацыі Беларускага фонду міру і было прынята рашэнне набыць 4 ЖК-тэлевізары ў палаты для ветэранаў. Пятая палата таксама будзе аснашчана новай тэхнікай.
Вольга Гаршкова папрасіла праз раённую газету выказаць словы ўдзячнасці ўсім, хто зрабіў добраахвотныя ахвяраванні ў Фонд міру, з дапамогай якіх і з’явілася магчымасць зрабіць прыемныя падарункі для ветэранаў.
Галоўны ўрач ЦРБ Алена Круцько падзякавала за падарункі, адзначыўшы, што работнікі бальніцы заўсёды актыўна ўносяць дабрачынныя ахвяраванні ў Фонд міру.
На момант правядзення акцыі на лячэнні ў бальніцы знаходзіліся ветэран Вялікай Айчыннай вайны Фёдар Андрэевіч Жданаў з в.Пацава Слабада і былы вязень фашызму Рыгор Захаравіч Каган. Наша дэлегацыя падтрымала іх добрымі словамі і пачаставала фруктамі.
Рыгор Захаравіч Каган адзначыў: “Вельмі прыемна, што ў раёне так клапоцяцца пра ветэранаў вайны і працы, лю-дзей, якія пацярпелі ад фашызму ў гады ваеннага ліхалецця”.
“Без тэлевізара я сваё жыццё проста не ўяўляю! — падкрэсліў Рыгор Захаравіч. — Я імкнуся ведаць, што адбываецца на міжнароднай арэне, унутры дзяржавы, у нашым раёне. Наяўнасць дадзенай тэхнікі не будзе адрываць пацыентаў ад знешняга свету падчас лячэння і будзе спрыяць больш хуткаму выздараўленню”.
Анастасія БЕГУНОВІЧ.
Фота
Людмілы СЯМЁНАВАЙ.
На здымку (справа): старшыня раённай арганізацыі ГА “Беларускі фонд міру” Вольга Гаршкова ўручае тэлевізары, намеснік старшыні райвыканкама Галіна Слабоднікава, галоўны ўрач ЦРБ Алена Круцько, ветэран працы Р.З.Каган.