У “Рассвеце” ўмеюць і працаваць, і адпачываць!

sem1 semm2

Напярэдадні Дня работнікаў сельскай гаспадаркі і перапрацоўчай прамысловасці АПК у Мышкавіцкім СДК адбылося ўшанаванне лепшых працаўнікоў палёў і ферм, спецыялістаў, кіраўнікоў сярэдняга звяна СВК “Рассвет” імя К.П.Арлоўскага. Сярод ганаровых гасцей былі ветэраны працы, чыімі працоўнымі дасягненнямі ствараліся вытворчыя і перапрацоўчыя магутнасці гаспадаркі, хто і зараз служыць дастойным прыкладам для маладога пакалення аграрыяў.

Вядучыя праграмы запрасілі прысутных у віртуальную экскурсію па славутай Мышкавіцкай зямлі. Для гэтага ўвазе сабраўшыхся быў прапанаваны відэафільм. На вялізным экране замільгалі кінакадры карпатлівай працы прадстаўнікоў розных падраздзяленняў сельгаскааператыва і іх здабыткаў. А голас за кадрам расказваў аб слаўных традыцыях рассветаўцаў, аб дасягненнях мінулых гадоў і перспектывах развіцця.
На сцэну запрасілі старшыню СВК “Рассвет” імя К.П.Алоўскага Аляксандра Багеля. Ад імя калектыву гаспадаркі яму быў уручаны святочны каравай. Звяртаючыся да прысутных, кіраўнік сельгаскааператыва павіншаваў іх са святам і агучыў вынікі бягучага сельскагаспадарчага года.
Аляксандр Багель, у прыватнасці, адзначыў, што працу хлебаробаў, жывёлаводаў, механізатараў, спецыялістаў АПК складана пераацаніць, менавіта ад укладу кожнага ў агульную скарбонку дасягненняў залежыць упэўненасць у заўтрашнім дні. Разам з тым, ён выказаў словы глыбокай удзячнасці ўсім працаўнікам за пасільны ўклад у развіццё сельгас-арганізацыі, вернасць роднай зямлі і сялянскай справе.
Бягучы год для сельгаскааператыва — юбілейны: споўнілася 70 гадоў з дня ўтварэння “Рассвета”. Вялікі і да-стойны шлях пройдзены гаспадаркай за значны перыяд.
У гэты святочны дзень са сцэны гучалі імёны тых, дзякуючы каму “Рассвет” стаў знакамітым не толькі ў рэспубліцы, але і далёка за яе межамі. Сярод іх — К.П.Арлоўскі, В.К.Старавойтаў, І.Л.Барышчык, Ф.Ф.Кісялёва, Н.Я.Бяляўская, М.Ф.Елісеенка, М.С.Дамарод і многія іншыя. Іх імёны залатымі літарамі ўпісаны ў слаўную гісторыю гаспадаркі.
Парадавалі вынікамі работы ў бягучым годзе хлебаробы гаспадаркі. Валавы збор збожжа склаў 17,8 тыс. т пры ўраджайнасці звыш 50,6 ц/га. Добра спрацавала раслінаводчая галіна. У бягучым годзе сабрана больш за 4750 т агародніны, што вышэй леташняга паказчыка на 45 т. Немалая заслуга ў дасягненні высокіх вытворчых паказчыкаў спецыялістаў гаспадаркі: намесніка старшыні Аляксандра Жылінскага, галоўнага тэхнолага цяплічнага камбіната Кацярыны Шапавалавай, начальніка вытворчага ўчастка «Стаўпішчы» Галіны Хмуровіч, начальніка вытворчага ўчастка “Сад” Алены Юркавец.
Старанна папрацавалі на вясенне-палявых і ўборачных работах механізатары Генадзь Шалянгоўскі, Віктар Зайцаў, Аляксандр Міхалап, Васіль Клімовіч, Мікалай Бандарэнка, Міхаіл Елісеенка, Юрый Каранкевіч, Канстанцін Галімскі, Іван Барысёнак і многія іншыя.
Сабраць ураджай — важная справа, але забяспечыць яго захаванасць — не менш адказна. Добра спраўляецца з гэтым калектыў агароднінасховішча пад кіраўніцтвам інжынера-тэхнолага Уладзіміра Русанава.
У бягучым годзе рассветаўцы плануюць атрымаць 14,5 тыс. т малака, што вышэй паказчыка мінулага года на 1021 т, а сярэдні ўдой на адну фуражную карову — 6568 кг. Флагманамі жывёлагадоўчай галіны з’яўляюцца Галіна Казлова, Кацярына Амбрасёнак, Галіна Лёгкая, Ірына Сушко, Ірына Комар, Наталля Бяляева, Святлана Лясковіч, Юрый Хмуровіч, Міхаіл Каранкевіч, Таццяна Андросава, Валерый Шчэрбіч і Таццяна Салановіч.
Словы ўдзячнасці прагучалі таксама ў адрас начальніка рыбнай гаспадаркі Алега Шапавалава, начальніка вытворчасці Алега Бяляўскага і рыбавода Уладзіміра Бяляўскага.
Радуе сваімі паказчыкамі і работа калектыву санаторыя імя К.П.Арлоўскага пад кіраўніцтвам Вольгі Гаршковай.
Высокай ацэнкі была ўдастоена работа вядучага інжынера па працаёмкіх працэсах Вахтанга Чэдзіі і галоўнага энергетыка Віктара Іванца, пад кіраўніцтвам якіх вяліся работы па добраўпарадкаванні цэнтральнай сядзібы кааператыву з тым, каб зямля дастойна сустрэла гасцей і ўдзельнікаў фестывалю-кірмашу працаўнікоў вёскі “Дажынкі-2014”.
У бягучым годзе споўнілася 30 год з дня за-снавання цяплічнага камбіната і рыбнай гаспадаркі, 15 год — МТК “Валосавічы”. З гэтай нагоды калектывам падраз-дзяленняў былі ўручаны памятныя падарункі.
Асаблівыя словы ўдзячнасці гучалі ў гэты дзень у адрас ветэранаў. Каштоўныя падарункі і кветкі атрымалі заслужаныя работнікі гаспадаркі, ветэраны, удзельнікі і інваліды Вялікай Айчыннай вайны.
Словы віншаванняў і падарункі атрымалі маладыя спецыялісты, якія ў бягучым годзе папоўнілі рады рассветаўскіх аграрыяў.
Шмат цёплых слоў прагучала ў адрас тых, хто шмат гадоў свайго жыцця прысвяціў рабоце ў гаспадарцы, а ў бягучым годзе выйшаў на заслужаны адпачынак. Сярод іх — Уладзімір Клімовіч, стаж работы якога складае 55 гадоў, Леанід Бяляўскі — 49 гадоў, Ніна Смалоўская — 37 гадоў, Тамара Койпіш і Соф’я Іваніцкая — па 30 гадоў і іншыя, усе яны атрымалі каштоўныя падарункі і кветкі.
Заключным акордам свята стаў вялікі канцэрт самадзейных артыстаў раёна. Парадаваў прысутных сваім выступленем і калектыў ансамбля казацкай песні “Вольніца” г.Бабруйска.
Людміла СЯМЁНАВА.
Фота
Максіма МІКЕШЫНА.

Добавить комментарий

Ваш адрес email не будет опубликован.