26 чэрвеня — Дзень работнікаў пракуратуры
Кожнаму работніку невялікага, але згуртаванага калектыву пракуратуры раёна ўласцівы такія якасці, як прынцыповасць, справядлівасць, настойлівасць, рашучасць і прыстойнасць. Без гэтага, на іх думку, немагчыма стаяць на абароне інтарэсаў дзяржавы і кожнага яе грамадзяніна, забеспечваць захаванне законнасці, ажыццяўляць нагляд за захаваннем і выкананнем прыродаахоўнага і зямельнага заканадаўства, весці барацьбу з карупцыяй і інш.
Праводзімая работа, а таксама ажыццяўленне прафілактычных мерапрыемстваў сумесна з РАУС, РАНС, іншымі зацікаўленымі службамі дазваляюць работнікам пракуратуры дабівацца станоўчых вынікаў. Так, з пачатку бягучага года па раёне зменшылася колькасць правапарушэнняў, учыненых непаўналетнімі, а таксама не было зарэгістравана наўмысных забойстваў, фактаў прычынення цяжкіх цялесных пашкоджанняў, няшчасных выпадкаў на вытворчасці і дарогах са смяротным зыходам.
У кола дзейнасці работнікаў пракуратуры таксама ўваходзіць кантроль за выкананнем заканадаўства па барацьбе з п’янствам і алкагалізмам, паколькі з ім звязана большасць учыненых злачынстваў і правапарушэнняў на тэрыторыі раёна, а таксама яно з’яўляецца асноўнай прычынай сямейнага дэбошу, гібелі і траўматызму людзей, іншых здарэнняў.
Шмат увагі надаецца сельскагаспадарчай вытворчасці: акцэнт ставіцца на пытаннях захаванасці сельгастэхнікі, прадукцыі, кармоў, ядахімікатаў. У ходзе праводзімых праверак устанаўліваюцца канкрэтныя факты безгаспадарчасці, аб чым паведамляецца кіраўніцтву. Работнікі пракуратуры ў абавязковым парадку дабіваюцца іх выкаранення.
На здымку: з выдатным настроем сустракаюць прафесійнае свята пракурор раёна Вячаслаў Чучулін, стажор на пасадзе памочніка пракурора Маргарыта Пірожнік і намеснік пракурора Ігар Алёхна.