6 кастрычніка — Дзень архівіста
У 1994 годзе быў прыняты Закон “Аб Нацыянальным архіўным фондзе і архівах у Рэспубліцы Беларусь”, і гэтая дата стала адзначацца ў нашай краіне як прафесійнае свята работнікаў архіўнай службы.
Калі гаварыць аб патрабаваннях, якія прад’яўляе да работнікаў такая прафесія, то гэта найперш уважлівасць, акуратнасць, нават скрупулёзнасць да кожнага запісу, факта, лічбы. Вольга Заркевіч (на здымку) працуе загадчыцай Кіраўскага раённага архіва другі год, а таму добра ведае, наколькі важныя гэтыя якасці ў яе справе. Бо ў большасці сваёй за кожным фактам, запісам, лічбай стаіць канкрэтны чалавек, яго лёс. І яна стараецца працаваць так, як таго патрабуюць прафесійныя патрабаванні.
Вядома, што ўласнае сховішча дакументаў ёсць практычна ў кожнай арганізацыі, але калі яна заканчвае сваю дзейнасць, уся асноўная дакументацыя пераходзіць менавіта ў раённы архіў.
Вольга Заркевіч згодна запытаў грамадзян састаўляе даведкі на пенсіі, рыхтуе інфармацыю аб гадах існавання той ці іншай установы і арганізацыі, словам, аказвае метадычную і практычную дапамогу. Калі трэба, то робіць выпіскі і ксеракопіі.
У раённы архіў за неабходнымі даведкамі звяртаюцца не толькі жыхары Кіраўшчыны і розных абласцей Беларусі, але і з краін блізкага замежжа.
Сваю дзейнасць раённы архіў пачаў 30 верасня 1993 года. На дадзены момант тут захоўваецца 254 фонды і 8080 спраў, пачынаючы з 1944 года. Асноўную масу дакументаў складаюць справы (разлікова-плацёжныя ведамасці і загады па асабістым складзе) арганізацый дзяржаўнай і недзяржаўнай форм уласнасці, а таксама ліквідаваных суб’ектаў гаспадарання.
Нямала сярод архіўных звестак інфармацыі, якая сведчыць аб развіцці раёна, адкрыцці новых прадпрыемстваў і арганізацый, іх функцыянаванні, рэарганізацыі ці ліквідацыі.