Як вядома, на вёсцы цэнтрам усіх грамадска-палітычных і культурна-масавых мерапрыемстваў, народных гулянняў, абрадаў, маладзёжных і дзіцячых дыскатэк, творчай працы розных гурткоў, калектываў, аматарскіх аб’яднанняў з’яўляецца сельскі Дом культуры ці клуб.

У Дабаснянскім СДК заўсёды гасцінна сустракаюць жыхароў і гасцей аграгарадка. Многія сяльчане так ці інакш звязаны з гэтай установай: самі з задавальненнем спяваюць ці ўдзельнічаюць у праводзімых тут мерапрыемствах, яе наведваюць іх дзеці ці ўнукі. Немалая заслуга ў гэтым дырэктара мясцовага СДК Галіны Пінчук, якая здолела аб’яднаць вакол сябе творчых людзей, накіраваць іх энергію ў патрэбнае рэчышча.
Калектыў Дабаснянскага СДК быў прызнаны лепшым па выніках штогадовага раённага спаборніцтва сярод устаноў культуры раёна на лепшую пастаноўку работы па развіцці культуры за 2016 год.
Кожны, хто наведваецца сюды, знаходзіць сабе занятак па душы. Тут працуе некалькі клубных фарміраванняў: вакальнае, вольнага часу, тэатральнае, дэкаратыўна-прыкладной творчасці.
Яркім і незабыўным стала правядзенне ў Добасне занальнага фестывалю маладзёжнай творчасці “Мы шукаем таленты”, конкурсна-гульнявой праграмы “Містар Гальштук. Міс Банцік” і іншыя. У цёплай і сардэчнай атмасферы прахо­дзяць мерапрыемствы для пажылых грамадзян. Адно з іх — “Сэрцам сагрэем, маршчынкі разгладзім”, прымеркаванае да Дня пажылога чалавека, пакінула ў сяльчан самыя станоўчыя эмоцыі.
Вялікую ўвагу надае калектыў СДК захаванню традыцыйнай культуры вёскі Добасна. Пасля дасканалага вывучэння маючыхся крыніц інфармацыі былі адноўлены мясцовыя абрады “Зборная субота” і “Бабіна каша”. Правядзенне такіх мерапрыемстваў дазваляе паказаць маладому пакаленню, наколькі багатая і разнастайная культурная спадчына беларускага народа.
Прадстаўнікі мясцовай мастацкай самадзейнасці — актыўныя ўдзельнікі розных раённых мерапрыемстваў і конкурсаў. Так, Аліна Собалева прызнана другой “Віцэ-Міс-2017” у раённым конкурсе “Міс Кіраўчанка-2017”, Кірыл Шамедзька заваяваў тытул “Містэр Ікс-2017” у адпаведным конкурсе.
Работнікамі ўстановы культуры вя­дзецца работа па маральна-эстэтычным выхаванні, фарміраванні здаровага ладу жыцця сярод дзяцей і моладзі. У гэтым напрамку падтрымліваецца цесная ўзаемасувязь з Дабаснянскім НПК ДС-СШ.
Радуе аматараў народных і папулярных песень вакальны калектыў “Чараўніцы” (на здымку). Таленавітыя жанчыны — пастаянныя ўдзельніцы раённых мерапрыемстваў і святаў.
Мясцовыя культработнікі прыкладаюць усе намаганні, каб зрабіць жыццё сяльчан цікавым, насычаным і разнастайным.