Напярэдадні свята ў аддзяленне кругласутачнага знаходжання для пажылых грамадзян і інвалідаў в.Хвайніца РЦСАН завіталі культработнікі і вучні СШ №2 імя К.П.Арлоўскага, каб павіншаваць прадстаўнікоў старэйшага пакалення з наступаючым Новым годам і Раством — гэтую традыцыю рабяты падтрымліваюць ужо сёмы год.
З прывітальным словам выступіла дырэктар СШ №2 імя К.П.Арлоўскага Галіна Русецкая, якая прыпаднесла насельнікам аддзялення падарунак ад вучняў — навагоднюю ёлачку, зробленую рукамі дзяцей, а таксама салодкасці і гарбату да святочнага чаяпіцця, якія прадаставіла індывідуальны прадпрымальнік Вольга Іваніцкая.
З музычным падарункам у Хвайніцу прыбылі і прадстаўнікі дзённага знаходжання для грамадзян пажылога ўзросту РЦСАН. Жанчыны спявалі пад акампанемент акардыёна, а потым разам з астатнімі атрымалі асалоду ад канцэрта, які падрыхтавалі і паказалі школьнікі разам з работнікамі Цэнтра культуры і адпачынку.
Вучаніцы Аляксандра Казлова, Вольга і Паліна Крапіўніцкія, Ганна Мурашка, якая, да слова, прыязджае ў аддзяленне кругласутачнага знаходжання пажылых грамадзян і інвалідаў ужо не ўпершыню, падарылі прысутным навагоднія песні. Таксама гледачы ўбачылі прыгожы танец са стужкамі.
На прадстаўленне завіталі Дзед Мароз са Снягуркай, якія таксама не давалі нікаму сумаваць. Віншаванні, вершы, загадкі весялілі народ, адусюль гучалі апладысменты і панавала атмасфера свята і навагодніх цудаў. Ва ўсіх ад сустрэчы ў душы засталіся шчырыя пачуцці і добры настрой.
Юлія ЗАВІШАВА.