Каля 800 чалавек у саставе 28 каманд сабраліся на мінулым тыдні ў Бялынічах, каб паўдзельнічаць у ХІ абласной зімовай спартакіядзе сярод сельскіх раёнаў Магілёўшчыны, холдынгаў, аб’яднанняў, арганізацый і кіраўнікоў аграпрамысловага комплексу па 10 відах спорту: валейболе, шашках, настольным тэнісе, лыжных гонках і эстафеце, кулявой стральбе, перацягванні каната, гіравым спорце, дартсе і плаванні.

Для кіраўчан гэтыя спаборніцтвы — зноў своеасаблівы зорны час — каманда стала сярэбраным прызёрам ХІ абласной зімовай спартакіяды!

Аб тым, як праходзілі спаборніцтвы, мы папрасілі расказаць старшыню райкама прафсаюза работнікаў АПК Віктара Ставера:

— Адбывалася ўсё на базе фізкультурна-аздараўленчага комплексу, які вельмі нас уразіў сваёй сучаснай і развітай матэрыяльна-тэхнічнай базай.

У пачатку мерапрыемства агонь спартакіяды запаліла ўдзельніца трох Алімпійскіх гульняў Валянціна Цыбульская.

Да прысутных звярнуўся старшыня камітэта па сельскай гаспадарцы і харчаванні аблвыканкама Валерый Сямёнаў. Ён адзначыў, што з кожным годам спартакіяда выходзіць на больш высока прафесіянальны ўзровень, яна садзейнічае не толькі папулярызацыі сярод прадстаўнікоў АПК здаровага ладу жыцця, развіццю спорту і фізічнай культуры, але і дапамагае згуртоўваць працоўныя калектывы, усталёўваць сяброўскія сувязі паміж работнікамі розных галін і прадпрыемстваў. Старшыня камітэта аблсельгасхарчу падзякаваў усім за актыўны ўдзел і пажадаў паспяховых выступленняў.

Напружаная барацьба сярод каманд у розных відах спорту была відовішчнай і захапляльнай. Кожны імкнуўся не проста дастойна выступіць, а абавязкова перамагчы. Шчыра адзначу, што спартыўная падрыхтоўка каманд з кожным годам толькі ўзмацняецца, таму і выйгрыш становіцца асабліва значным і важкім.

Прадстаўнікі нашай каманды падчас спартакіяды прадэманстравалі высокую падрыхтоўку і згуртаванасць. Па ўсіх відах спаборніцтва кіраўчане ніводнага разу не апускаліся ніжэй за 10 месца. У дартсе нам увогуле не было роўных, выдатныя вынікі прадэманстравалі Алеся Шалянгоўская і Яўген Пішчалін. У гіравым спорце нашы прадстаўнікі занялі другое каманднае месца, лепшым стаў Андрэй Семенчукоў. Другое месца ў плаванні заваяваў Сяргей Лыбзікаў.

Адзначу, што немалаважным стымулам для нашага ўдалага выступлення стала дакладная арганізацыя падрыхтоўкі да паездкі, належныя ўмовы пражывання і забеспячэнне своечасовага якаснага харчавання, выдатная экіпіроўка і спартыўны інвентар каманды.

Прыемна, што кіраўніцтва раёна, райсельгасхарчу, арганізацый з разуменнем ставяцца да нашага ўдзелу ў абласной спартакіядзе. Хочацца выказаць словы ўдзячнасці работнікам упраўлення райсельгасхарчу і асабіста першаму намесніку старшыні райвыканкама, начальніку райсельгасхарчу Анатолю Ланкуцю, кіраўнікам арганізацый, устаноў (асабліва Жыліцкага сельгаскаледжа, КСУП “Чырвоны баец”, СВК “Рассвет” імя К.П.Арлоўскага). Дарэчы, на базе апошняй гаспадаркі фарміруецца зборная каманда раёна, капітанам якой з’яўляецца Яўген Пішчалін. Дапамогу аказалі аддзел адукацыі, спорту і турызму райвыканкама, фізкультурна-спартыўны клуб, СДЮШАР.

Мы зноў у тройцы лідараў: гэта ганарова і дастойна. Увогуле ў скарбонцы кіраўчан, пачынаючы з 2013 года, калі адбылася першая спартакіяда, 7 сярэбраных медалёў і 1 “золата”. Але спыняцца на дасягнутым не збіраемся. Члены каманды актыўна ўзяліся за падрыхтоўку да летняй абласной спартакіяды работнікаў АПК, якая пройдзе ў Быхаве.

Падрыхтавала Людміла СЯМЁНАВА.