Яшчэ не сышоў з палёў снег, а ўсе думкі і намаганні земляробаў засяроджаны на падрыхтоўцы да паспяховага правядзення веснавой палявой кампаніі.

Упэўнена адчуваюць сябе ў гэтым плане работнікі ААТ “Кіраўскае райаграпрамтэхзабеспячэнне”. Як адзначыў у размове галоўны механік Святаслаў Русецкі, практычна ўся наяўная тэхніка пад­рыхтавана не толькі да веснавой палявой кампаніі, але і да наступных работ. На лінейцы гатоўнасці — 39 трактароў, з іх 6 — энерганасычаных. У спраўным стане — агрэгаты для ўнясення ўгнаенняў. Даведзена да ладу іншая тэхніка, якая будзе задзейнічана на сельгасработах, у тым ліку на корманарыхтоўцы — камбайны, прэс-падборшчыкі, касілкі, граблі…
— Усё, што робіцца, — падкрэсліў Святаслаў Русецкі, — вынік адказнай працы калектыву РАПТЗ. Кожны добра ведае сваю справу, з пачуццём адказнасці ставіцца да яе, “хварэе” за вынікі работы.
Рыхтаваць глебу пад сяўбу будуць Уладзімір Шалянгоўскі, Уладзімір Сакалоўскі, Сяргей Зазерскі. Самаходны сродак “Раса” даручаны Дзмітрыю Комару. Не менш адказныя ўчасткі работ у Яўгена Якімчанкі, Яўгена Рудака, Пятра Дразда, Паўла Марозава, Андрэя Хлапкова, Анатоля Дзікуна, Аляксандра Тылінскага. Кожны з іх не толькі рыхтуе сваю тэхніку, а і дапамагае калегам. З пасяўнымі агрэгатамі будуць працаваць Ула­дзімір Комар, Аляксандр Сідарэнка. Як не прыгадаць пры гэтым тых, без каго не абыдзецца ніякі рамонт, — слесараў, токараў, электрыкаў, газазваршчыкаў… У залаты фонд калектыву РАПТЗ можна па праву аднесці Анатоля Стальмакова, Васіля Рублеўскага, Уладзіміра Свірко, Сяргея Капусту. Надзейна ўліўся ў калектыў Аляксандр Нарэзенка, які выдатна разбіраецца ў сучаснай тэхніцы, электроніцы. А сёння без прымянення сучасных тэхналогій нельга забяспечыць эфектыўную працу ні ў якай галіне, у тым ліку ў сельскагаспадарчай.
Аляксандр ХАХЛОЎ.
На фота: механізатары РАПТЗ Аляксандр Сідарэнка і Аляксандр Тылінскі, галоўны механік Святаслаў Русецкі абмяркоўваюць пытанне тэхнічнага забеспячэння палявых работ.