СШ №2 імя К.П.Арлоўскага: агульная праца — агульныя поспехі
Настаўнік англійскай мовы Марына Карніцкая стала пераможцай раённага конкурсу прафесійнага майстэрства педагагічных работнікаў “Настаўнік года”.
У спаборніцтве сярод галін гаспадаркі раёна за 2017 год лепшай па прафесіі ў намінацыі “Лепшы работнік адукацыі” стала настаўнік нямецкай мовы СШ №2 імя К.П.Арлоўскага Таццяна Апсіт.
Па выніках раённага спаборніцтва за 2017 год лепшым сярод калектываў устаноў агульнай адукацыі прызнаны калектыў СШ №2 імя К.П.Арлоўскага. Аб поспехах і дасягненнях за мінулы год расказала дырэктар установы Галіна РУСЕЦКАЯ:
— Перш за ўсё, хачу нагадаць, што мінулы год для нас быў азнаменаваны тым, што наша ўстанова адукацыі рэарганізавана шляхам пераўтварэння з гімназіі ў сярэднюю школу №2 імя К.П.Арлоўскага.
Што тычыцца паказчыкаў, то яны не выпадковыя, а вынік крапатлівай працы работнікаў установы, вучняў і іх бацькоў. У мінулым годзе наш калектыў працаваў над павышэннем якасці адукацыі і са сваімі задачамі справіўся нядрэнна.
Якасць адукацыйнай падрыхтоўкі вучняў была пацверджана і вынікамі выпускных экзаменаў па завяршэнні навучання і выхавання на ІІ і ІІІ ступенях агульнай сярэдняй адукацыі. Чацвёра вучняў атрымалі пасведчанне аб агульнай базавай адукацыі з адзнакай, 1 вучань — атэстат асобага ўзору з залатым медалём.
Палепшыліся вынікі цэнтралізаванага тэсціравання. Па ўсіх вучэбных прадметах, якія здавалі нашы выпускнікі на ЦТ, сярэдні бал вышэй раённага і вышэй абласнога паказчыкаў. Асаблівы наш гонар — Святлана Ісаічкіна (настаўнік Таццяна Апсіт), якая па нямецкай мове атрымала максімальную колькасць балаў – 100. Усе нашы выпускнікі 2017 года жыццеўладкаваны, 80% з іх паступілі ва ўстановы вышэйшай адукацыі.
Высокую рэзультатыўнасць нашы рабяты паказалі на другім (раённым) этапе рэспубліканскай алімпіяды па вучэбных прадметах: 66 дыпломаў, што складае 42,6 %
ад агульнай колькасці атрыманых вучнямі раёна дыпломаў. Удалым быў і трэці (абласны) этап рэспубліканскай алімпіяды па вучэбных прадметах. Адзінаццацікласніцы Дзіяна і Святлана Ісаічкіны (настаўнік Таццяна Апсіт) заваявалі дыпломы III і II ступеняў адпаведна па нямецкай мове, Павел Хурсаў (настаўнік Алена Жлобіч) — дыплом III ступені па інфарматыцы.
Летась нашы вучні заваявалі 111 дыпломаў у раённых творчых конкурсах і спартыўных спаборніцтвах, 14 — у абласных, 6 — у рэспубліканскіх, 27 — у міжнародных.
Зразумела, такія дасягненні магчымыя толькі пры зладжанай рабоце, адукацыйным і кваліфікацыйным узроўні ўсяго педагагічнага калектыву, які прадстаўлены 44 работнікамі.
На рахунку настаўнікаў — 6 дыпломаў у раённых конкурсах розных накірункаў. Так, напрыклад, настаўнік англійскай мовы Марына Карніцкая перамагла ў раённым конкурсе прафесійнага майстэрства педагагічных работнікаў «Настаўнік года». Намеснік дырэктара па вучэбнай рабоце Алена Каранкевіч і настаўнік гісторыі Валянціна Яскевіч узнагароджаны граматай за ўдзел у праекце «Любі і ведай свой край» рэгіянальнага конкурсу «Экомир-2017»; Валянціна Яскевіч — граматай Цэнтра даследаванняў беларускай культуры, мовы і літаратуры Акадэміі навук Беларусі; дыпломы І ступені атрымалі Алена Каранкевіч у Міжнародным творчым конкурсе «Метадычная распрацоўка педагога» і настаўнік англійскай мовы Наталля Максіменка ў Міжнародным дыстанцыйным конкурсе для педагогаў «Новае пакаленне»; дыплом ІІ ступені — Валянціна Яскевіч ў Міжнародным дыстанцыйным конкурсе.
У 2017 годзе ў нашай установе адукацыі завяршылася рэалізацыя рэспубліканскага інавацыйнага праекта «Укараненне мадэлі арганізацыі навучання як вучэбнага даследавання вучняў (прадметы прыродазнаўча-навуковага цыкла)», удзел у якім таксама з’яўляецца паказчыкам прафесіяналізму, педагагічнай ініцыятывы і творчасці педкалектыву.
Калектыў работнікаў установы, вучняў і іх бацькоў плённа працаваў над выкананнем іншых паказчыкаў, таму лічу, што і перамога ў нас агульная.