Сустрэчы з пісьменнікам-земляком Алесем Казекам у цэнтральнай бібліятэцы
У межах Міжнароднага дня роднай мовы ў Кіраўскай цэнтральнай бібліятэцы прайшлі сустрэчы з пісьменнікам-земляком Алесем Казекам, старшынёй Магілёўскага абласнога аддзялення грамадскага аб’яднання «Саюз пісьменнікаў Беларусі».
Алесь Казека – ураджэнец вёскі Новы Юзін нашага раёна. У 1970 годзе яго сям’я пераехала ў вёску Чачэвічы Быхаўскага раёна. Пасля заканчэння Чачэвіцкай сярэдняй школы ён паступіў у Арлоўскае вышэйшае ваеннае вучылішча сувязі. Служыў у Арле, Уладзівастоку, Бранску і Магілёве. Пасля выхаду ў запас працаваў настаўнікам у вёсцы Чачэвічы, потым – у Магілёўскай абласной філармоніі. Піша на беларускай і рускай мовах. Аўтар зборнікаў вершаў «Перекрёстки судеб», «Души моей родник», «Мелодия надежды», «Единственный друг», «Час сяўбы», паэм «Медуніца», «Марыйка» і іншых. Акрамя таго яго вершы змешчаны ў калектыўных зборніках «Мы – дзеці твае, Беларусь», «Прыдняпроўе – маё натхненне».
З 2016 года з’яўляецца старшынёй Магілёўскага абласнога аддзялення ГА «Саюз пісьменнікаў Беларусі».
Падчас літаратурнай сустрэчы «Слова да роднай зямлі», якая прайшла ў рамках адзінага дня інфармавання, Алесь Казека сустрэўся з ідэалагічнымі работнікамі, прадстаўнікамі культуры і адукацыі, жыхарамі раёна.
Літаратурная гасцёўня «Сэрца, якое належыць Беларусі» прайшла з удзелам навучэнцаў школ горада. У час размовы з дзецьмі Алесь Казека падзяліўся, што значыць для яго Радзіма, і спытаўся пра іх адносіны да гэтага паняцця.
Па словах дырэктара сеткі бібліятэк раёна Марыны Цвятковай, абедзве сустрэчы прайшлі ў даверлівай атмасферы. Падчас размовы ўзнімаліся пытанні аб значэнні роднай мовы і паэзіі. У ходзе сустрэчы прысутныя даведаліся пра цікавыя моманты з жыцця паэта, пазнаёміліся са зборнікамі паэзіі творцы, паслухалі песні на яго словы.
Таксама быў прадэманстраваны запіс тэатралізацыі паэмы «Марыйка», пастаўлены падчас правядзення мітынгу-рэквіему ў вёсцы Боркі, дзе ў чэрвені 1942 года была праведзена буйная карная аперацыя фашыстаў супраць мірнага насельніцтва. Алесь Казека са сваёй сям’ёй з’яўляюцца сведкамі цяжкіх успамінаў Марыі Казека – маці паэта, якія леглі ў аснову гэтага твора.
Такія сустрэчы вельмі карысныя и даюць магчымасць шмат аб чым даведацца.