Газета піша летапіс раёна
Пастановай ЦВК і СНК БССР ад 12 лютага 1935 года быў утвораны Кіраўскі раён. У хуткім часе ўтвараюцца райкам партыі, райвыканкам, райкам камсамола і шэраг іншых арганізацый, у тым ліку рэдакцыя газеты “Кіравец”. Першы нумар “раёнкі” выйшаў у сакавіку 1935 года. Так пачаўся яе насычаны шлях, кожны этап якога – у памяці і сэрцы назаўсёды…
Абапіраючыся на традыцыі, закладзеныя былымі супрацоўнікамі, развіваючы і прымнажаючы іх, сённяшні калектыў “Кіраўца” імкнецца трымаць руку на пульсе жыцця раёна, адпавядаць патрабаванням часу, удасканальваць змястоўны ўзровень газеты, а таксама паляпшаць яе дызайн, аператыўна напаўняць сайт, працуюць у сацыяльных сетках.
Работа па рэалізацыі важнейшых прынцыпаў дзяржаўнай інфармацыйнай палітыкі ажыццяўляецца ў цесным узаемадзеянні з заснавальнікамі выдання: Кіраўскім раённым выканаўчым камітэтам, раённым Саветам дэпутатаў.
Жыхары Кіраўшчыны, па іх водгуках, бачаць у “раёнцы” шчырую суразмоўцу, добрую дарадчыцу, незаменную крыніцу інфармацыі і многія гады застаюцца вернымі ёй.
На рахунку калектыву рэдакцыі ёсць адметныя дасягненні: у межах штогадовага абласнога спаборніцтва сярод дзяржаўных выданняў і журналістаў Магілёўскай вобласці, рэспубліканскім конкурсе на лепшае асвятленне пытанняў міжнацыянальных і міжканфесіянальных адносін, міжкультурнага дыялогу ў Рэспубліцы Беларусь і супрацоўніцтва з суайчыннікамі за мяжой і іншых. Вылучаліся ў розных конкурсах і асобныя супрацоўнікі.
Калектыў рэдакцыі, у якім сёння і маладыя супрацоўнікі, вызначае перад сабой новыя задачы і нацэлены на іх паспяховае выкананне.