Займацца любімай справай – значыць быць паспяховым
Прафесія адваката – адна з самых цікавых і шматгранных, – менавіта так лічыць адвакат юрыдычнай кансультацыі раёна Эдуард Лапшынаў. І хаця адвакацкай дзейнасцю ён займаецца крыху больш года, за гэты час упэўніўся ў тым, што грунтуецца яна на галоўным прынцыпе – абарона правоў, свабод і законных інтарэсаў грамадзян.
Жаданне дапамагаць у Эдуарда было развіта з дзяцінства. Мабыць, таму, калі закончыў школу, пры паступленні не вагаўся з выбарам навучальнай установы – абраў Акадэмію МУС Рэспублікі Беларусь. Пасля заканчэння следча-экспертнага факультэта быў накіраваны ў Бабруйскі міжраённы аддзел Следчага камітэта, дзе на працягу 5 год працаваў старшым следчым. А затым Эдуард вырашыў кардынальна змяніць сваё амплуа: прайшоў неабходную працэдуру, здаў экзамен, які, дарэчы, выпаў на яго дзень нараджэння, і атрымаў магчымасць заняцца адвакацкай дзейнасцю. Такі выбар ён растлумачыў жаданнем дапамагаць людзям, якія трапляюць у складаную жыццёвую сітуацыю. Аб сваім рашэнні ніколькі не шкадуе. Першае, што падабаецца ў рабоце, – жывыя зносіны з кліентамі. Кожны прыходзіць да адваката з адзіным жаданнем – каб атрымаць прафесійную дапамогу. Па-другое, калі ён бярэцца за справу, ніколі не ведае, як яна “разгарнецца”, што падчас скрупулёзнага даследавання ўдасца высветліць, якім будзе канчатковы вынік. Вось гэта, па словах субяседніка, прымушае актывізаваць усе сілы, веды і жаданне дапамагчы. А самымі прыемнымі момантамі ў рабоце малады адвакат лічыць шчаслівыя твары кліентаў, якім удалося станоўча вырашыць хвалюючыя пытанні.
Знаходзіць вырашэнне самых складаных спраў Эдуарду Лапшынаву дапамагаюць веды і навыкі, атрыманыя падчас работы ў Следчым камітэце, і такія якасці характару, як адказнасць, настойлівасць, жаданне высветліць сітуацыю да дробязей, разабрацца нават у самай складанай справе.
Кола дзейнасці маладога адваката вельмі шырокае: жыллёвыя і зямельныя спрэчкі, раздзел маёмасці, справы пры атрыманні ў спадчыну, крымінальныя справы і іншае.
З удзячнасцю прымае ён дапамогу і падтрымку больш вопытнага калегі, загадчыцы юрыдычнай кансультацыі Наталлі Пішчык. Ёсць магчымасць пракансультавацца па найбольш складаных пытаннях у Магілёўскай абласной калегіі адвакатаў. Супрацоўнік юрыдычнай кансультацыі ўпэўнены, што для таго, каб выйграць працэс, трэба выдатна ведаць заканадаўства, а, значыць, неабходна пастаянна павышаць свой прафесійны ўзровень.
Сваім жыццёвым крэда адвакат лічыць простае правіла – дзейнічаць выключна ў інтарэсах свайго кліента. І гэта вельмі дапамагае яму заваёўваць аўтарытэт і сярод калег, і сярод грамадзян, якім неабходна абараніць свае правы.
Людміла СЯМЁНАВА. Фота аўтара.