Выбраць будучыню РАЗАМ
Працягваем экспрэс-апытанне, як кіраўчане ставяцца да прадстаячай важнай палітычнай падзеі – выбараў Прэзідэнта Рэспублікі Беларусь.
Алена ОСІПАВА, першы сакратар райкама ГА “БРСМ”:
– На мой погляд, да ўдзелу ў выбарах Прэзідэнта Рэспублікі Беларусь грамадзяне павінны ставіцца з усёй адказнасцю, бо за голасам кожнага выбаршчыка – будучае краіны.
На сённяшні дзень беларуская дзяржава стабільна і ўпэўнена развіваецца. Шмат увагі з боку яе кіраўніцтва надаецца ажыццяўленню маладзёжнай палітыкі. Моладзь з’яўляецца найбольш актыўнай часткай грамадства і магутным стратэгічным рэсурсам дзяржавы. У краіне, у тым ліку і ў нашым раёне, на пастаяннай аснове праводзіцца комплекс мерапрыемстваў па фарміраванні ў маладых людзей актыўнай жыццёвай пазіцыі, развіццю іх прававой культуры.
Зараз, падчас летніх канікулаў, некалькі дзясяткаў юнакоў і дзяўчат Кіраўшчыны шчыруюць у саставе будаўнічых, сельскагаспадарчых студэнцкіх атрадаў. Гэта адна з форм работы з моладдзю па фарміраванні ў іх адказнага стаўлення да выканання працоўных абавязкаў, а таксама магчымасць у вольны ад вучобы час зарабіць.
Ад удзелу кожнага з нас у выбарах Прэзідэнта Рэспублікі Беларусь залежыць будучае дзяржавы і новых пакаленняў яе жыхароў, гісторыя народа. Зрабіць выбар на карысць мудрага і дальнабачнага кандыдата, які выступае за стабільнасць, мір і спакой у краіне, – залог нашага далейшага дабрабыту.
Нельга заставацца абыякавым у такі важны палітычны момант!