Наперадзе — заключны этап рэспубліканскай алімпіяды
Лепшай знаўцай сярод вучняў агульнаадукацыйных навучальных устаноў Магілёўшчыны па прадмеце “Працоўнае навучанне” стала вучаніца 9 класа СШ№1 нашага горада Марына Заркевіч (настаўнік А.У.Пар-хамовіч)(на здымку). Менавіта ў гэтай намінацыі Марына прадстаўляла наш раён на трэцім этапе рэспубліканскай алімпіяды па матэматыцы, працоўным навучанні, нямецкай мове, які праходзіў ў г.Магілёве з 9 па 13 студзеня 2012 года.
Глыбокія тэарэтычныя веды, трывалыя практычныя навыкі, працавітасць дзяўчыны, яе артыстызм і імкненне да перамогі былі высока ацэнены членамі абласнога журы, якія аднадушна аддалі ёй першае месца. Па выніках трэцяга этапа рэспубліканскай алімпіяды Марына (з улікам рэйтынгу) ўзнагароджана дыпломам II ступені і грашовай прэміяй. Ёй прадстаіць адказная місія: дастойна прадставіць Магілёўскую вобласць на заключным этапе рэспубліканскай алімпіяды, які будзе праходзіць у г.Мазыры.