Шматлюдна было ў аграгарадку Мышкавічы ў дзень адкрыцця новага аб’екта гандлю райспажыўтаварыства, які ўступіў у строй дзеючых пасля праведзенай мадэрнізацыі памяшкання былога магазіна прамысловых тавараў. На ўрачыстае мерапрыемства сабраліся кіраўнікі розных службаў рэспубліканскага, абласнога і раённага ўзроўняў, мясцовыя жыхары, моладзь. Для сяльчан — гэта адна са знакавых падзей, якімі ў апошні час жыве сельскі населены пункт з нагоды маючых адбыцца тут «Дажынак».

На цырымоніі адкрыцця да прысутных звярнуўся старшыня Белкаапсаюза Валерый Іваноў. У сваёй прамове ён адзначыў, што яму вельмі прыемна бачыць людзей, з якімі некалі працаваў, будучы старшынёй СВК “Рассвет” імя К.П.Арлоўскага, і ён радуецца разам з імі з нагоды адкрыцця ў Мышкавічах сучаснага гандлёвага аб’екта. “Мы і ў далейшым будзем развіваць сетку магазінаў “Родны кут”,— падкрэсліў далей Валерый Мікалаевіч.— Тым больш, што Прэзідэнт краіны паставіў перад намі задачу, каб сяльчане сельскіх населеных пунктаў мелі магчымасць купляць неабходныя тавары па месцы жыхарства па даступных цэнах, а не ехалі за імі ў горад. Ужо маюцца станоўчыя водгукі жыхароў рэспублікі наконт дзейнасці ўведзеных у строй падобных дзеючых аб’ектаў. Таму работнікам галіны спажыўкааперацыі трэба імкнуцца да таго, каб колькасць пастаянных пакупнікоў з кожным днём павялічвалася. А для гэтага неабходна плённа працаваць у розных напрамках”.
Старшыня райспажыўтаварыства Святлана Сарока запэўніла жыхароў аграгарадка, што кааператары далей будуць укараняць у работу новыя падыходы ў плане маркетынгу: гэта правядзенне рознага роду ўласных акцый, а таксама сумесна з вытворцамі. Плануецца выкарыстоўваць і іншыя не менш эфектыўныя метады ў арганізацыі гандлёвай дзейнасці. І ўсё гэта — для выгод і зручнасці сяльчан. Святлана Рыхардаўна паведаміла прысутным, што ў хуткім часе побач з новай гандлёвай кропкай для іх будзе адкрыта кафэ-піцэрыя.
«Сёння мы прысутнічаем на адкрыцці аднаго з аб’ектаў, якія ўключаны ў план мерапрыемстваў у межах падрыхтоўкі да абласнога фестывалю-кірмашу “Дажынкі-2014”, — адзначыў у сваёй прамове старшыня СВК “Рассвет” імя К.П.Арлоўскага Аляксандр Багель. — Спадзяюся на разуменне нашых жыхароў у сувязі з часовымі нязручнасцямі з-за правядзення будаўнічых работ і навядзення парадку на вуліцах населенага пункта. Тым больш, што ўсё зробленае застанецца для нас на доўгія гады. Вельмі хочацца, каб вынікі сумеснага старання са-дзейнічалі паляпшэнню камфортнасці пражывання нашых працаўнікоў, узнімалі ім настрой».
Права перарэзаць сімвалічную чырвоную стужку перад уваходам у гандлёвы цэнтр было прадастаўлена Валерыю Іванову і Аляксандру Багелю. Затым перад прысутнымі гасцінна расчыніліся дзверы, і ў кожнага жадаючага з’явілася магчымасць пазнаёміцца з унутраным аздабленнем магазіна, а таксама зрабіць тут першую пакупку. Гаспадары гандлёвага цэнтра пачаставалі гасцей рознымі салодкасцямі.

(Працяг у №52 ад 15 ліпеня).