На маляўнічым беразе Чыгірынскага вадасховішча на раённы турыстычны злёт сабраліся сёлета 9 каманд арганізацый, прадпрыемстваў, устаноў раёна: райвыканкама, аддзела адукацыі, спорту і турызму райвыканкама, райбальніцы, Жыліцкага сельгаскаледжа, ліцэя №15, СВК “Рассвет” імя К.П.Арлоўскага, “Добасна-агра”, “Калгас “Свярдлова”, “Калгас “Ніва”. Нягледзячы на няўстройлівае надвор’е на працягу трох дзён, ва ўсіх удзельнікаў быў выдатны настрой, кожная каманда імкнулася да перамогі.

Напачатку прыбыўшыя турысты заняліся ўладкаваннем палатачнага лагера, стварэннем належных бытавых умоў.
Спаборніцтвы пачаліся са стральбы з пнеўматычнай вінтоўкі. Члены каманд аддзела адукацыі, спорту і турызму райвыканкама, Жыліцкага сельгаскаледжа і СВК “Рассвет” імя К.П.Арлоўскага праявілі найбольшую меткасць, што дазволіла ім заняць адпаведна першыя тры месцы.
На наступны дзень раніцай удзельнікі спаборнічалі ў лоўлі рыбы на вадасховішчы. Тут, як і ў папярэднія гады, не было роўных рассветаўцам. Другое месца дасталося прадстаўнікам аддзела адукацыі, спорту і турызму райвыканкама, трэцяе падзялілі паміж сабой каманды райвыканкама і СВК “Калгас “Свярдлова”.
Спартсмены аддзела адукацыі, спорту і турызму змаглі даць фору сваім сапернікам у спаборніцтвах па дартсе. Крыху адсталі ад іх рассветаўцы і прадстаўнікі райвыканкама — на іх рахунку адпаведна другое і трэцяе месцы.
Тым часам упартая барацьба была і на валейбольнай пляцоўцы: уся гульня праходзіла пад дажджом. Але, нягледзячы на гэта, у пляжным валейболе вялі лік рассветаўцы. Другое агульнакаманднае месца занялі прадстаўнікі СВК “Добасна-агра”, трэцяе — аддзела адукацыі, спорту і турызму райвыканкама.
Цікава было назіраць за ўсімі ўдзельнікамі пры пераадольванні імі паласы перашкод — адным з асноўных турыстычных спаборніцтваў. Па выніках упартай барацьбы тры першыя месцы размеркаваліся наступным чынам: рассветаўцы, ліцэісты, ніваўцы.
Эмоцыі зашкальвалі на спаборніцтвах па перацягванні канату. Перамогу святкавала каманда СВК “Калгас “Ніва”, на другім месцы — прадстаўнікі аддзела адукацыі, спорту і турызму райвыканкама, на трэцім — ліцэісты.
Конкурс на лепшую арганізацыю быту выйграла каманда ліцэя №15.
Дзякуючы праяўленай фантазіі ў афармленні, удалай рэалізацыі кухарскіх сакрэтаў пры прыгатаванні турыстычнай стравы першае месца судзейская калегія аддала прадстаўнікам райвыканкама.
З творчым падыходам падрыхтаваліся каманды да конкурсу мастацкай самадзейнасці: усе паказалі сябе сапраўднымі артыстамі. Турысты спявалі, чыталі вершы, паказвалі гумарыстычныя сцэнкі. Тут не было роўных свярдлоўцам.
А ўвогуле, перамагчы жадалі ўсе, але ўдалося гэта мацнейшым. Па выніках турзлёту лепшай прызнана каманда СВК “Рассвет” імя К.П.Арлоўскага. Дарэчы, сёлета рассветаўцы святкавалі перамогу ў восьмы раз! Другое месца прысуджана калектыву аддзела адукацыі, спорту і турызму. Трэцюю пазіцыю занялі прадстаўнікі ліцэя №15.
Пераможцам і прызёрам спаборніцтваў былі ўручаны кубак, медалі, дыпломы, а па выніках незаліковых конкурсаў лепшыя каманды атрымалі каштоўныя падарункі.
Наталля МАІСЕЕНКА,
галоўны спецыяліст аддзела адукацыі, спорту і турызму
райвыканкама.