Асноўны накірунак работы раённага камітэта прафсаюза работнікаў АПК — клопат пра чалавека працы. У мінулую сераду, калі ў краіне адзначалася цудоўнае свята — Дзень маці, адбылося ўшанаванне жанчын, якія нарадзілі і выхавалі трох і больш дзяцей і плённа працуюць у сельскагаспадарчай галіне раёна. 

У цёплай і шчырай атмасферы прайшла сустрэча старшыні райкама прафсаюза работнікаў АПК Віктара Ставера, прадстаўнікоў адміністрацыі і прафкама ААТ “Кіраўскае райаграпрамтэхзабеспячэнне” з працаўнікамі МТФ “Пацава Слабада” і МТК “Уласавічы”. У адрас жанчын прагучалі словы віншаванняў з нагоды свята, а таксама словы ўдзячнасці за іх нялёгкую, але такую неабходную працу.
Звяртаючыся да прысутных, Віктар Ставер адзначыў, што цяжка пераацаніць ролю жанчыны-маці, якой, акрамя работы, даводзіцца клапаціцца пра сямейныя справы, падтрымліваць цяпло дамашняга ачага, дарыць бязмежную любоў і пяшчоту блізкім людзям, выхоўваць дзяцей, вучыць іх прымаць узважаныя рашэнні, быць адказнымі і працавітымі.
За шматгадовую добрасумленную працу, дастойнае выхаванне дзяцей, актыўную грамадскую дзейнасць каштоўныя падарункі і кветкі былі ўручаны брыгадзіру РАПТЗ Галіне Жукоўскай, аператару па адкорму БРЖ Лідзіі Макаранка, аператару машыннага даення кароў Вікторыі Кудзінавай.
Сярод ушанаваных у гэты дзень былі і прадстаўніцы іншых арганізацый і прадпрыемстваў, якія ўваходзяць у структуру раённай арганізацыі прафсаюза работнікаў АПК: СВК “Рассвет” імя К.П.Арлоўскага — аператар машыннага даення кароў Алена Бяляўская, учотчык трактарнай брыгады Вольга Свірко, афіцыянт санаторыя “Рассвет” Надзея Бобр, швачка пашывачнага цэху гаспадаркі Таццяна Бандарэнка; СВК “Чырвоны баец” — вагаўшчыца Святлана Раманоўская; СВК “Добасна-агра” — аператары машыннага даення кароў Надзея Русава і Валянціна Бабіч; СВК “Калгас “Свярдлова” — аператар па вырошчванні БРЖ Ларыса Казакова і аператар машыннага даення кароў Ларыса Шэстакова; СВК “Калгас “Беларусь” — аператар машыннага даення кароў Ганна Фралова; ААТ “ПМК-97 Вадбуд” — бухгалтар Галіна Наскавец; ліцэя №15 — выхавальнік Валянціна Кухарэнка і прыбіральшчык памяшканняў Святлана Заблоцкая; Жыліцкага сельгаскаледжа — лабарант Алена Фірагіна; цэнтра падрыхтоўкі, павышэння кваліфікацыі і перападрыхтоўкі рабочых упраўлення сельскай гаспадаркі і харчавання райвыканкама — Еўдакія Сідарава; упраўлення сельскай гаспадаркі і харчавання райвыканкама — галоўны спецыяліст сектара ўліку і справа-здачы Надзея Багель і галоўны спецыяліст аддзела інтэнсіфікацыі вытворчасці Алена Пацэвіч.
Каб гэты дзень сапраўды быў святочным, а за кубкам чаю жанчыны-маці змаглі адпачыць ад сваіх штодзённых клопатаў, ім былі ўручаны салодкія тарты і фрукты.
Людміла СЯМЁНАВА.
Фота аўтара.