Фестываль праваслаўнай культуры на Кіраўшчыне
Кіраўчане ў чарговы раз прымаюць на сваёй зямлі праваслаўную выставу-кірмаш “Кладзезь”, работа якой наладжана ў раённым Доме культуры і прадоўжыцца да 31 студзеня.
Гэты фестываль праваслаўнай культуры, арганізатарамі якога выступаюць Магілёўская і Мсціслаўская епархія, Кіраўскі раённы выканаўчы камітэт, Сястрыцтва ў гонар святой вялікамучаніцы княгіні Елісаветы (г.Мінск), праходзіць на Кіраўшчыне традыцыйна пасля навагодніх і калядных святаў. Многія жыхары раёна з нецярпеннем чакаюць гэтай падзеі.
Уражаннямі дзеліцца адна з першых наведвальніц выставы-кірмашу кіраўчанка Таццяна: “Так, мы сапраўды чакаем “Кладзезь”, гэту падзею па праву можна назваць святам — праваслаўя, веры, малітвы, любові. Па магчымасці стараемся наведваць мерапрыемствы фестывалю як мага часцей. Набываем царкоўныя тавары, іконы, дыскі, кнігі, травяныя зборы, мазі, бальзамы, падарункі і сувеніры для блізкіх. Аднак галоўнае — пабываўшы тут, адчуваеш, як душа напаўняецца радасцю, чысцінёй думак і светам”.
Акрамя шырокага выбару тавараў у межах фестывалю кожны дзень наладжваюцца прагляды фільмаў і мультфільмаў, сустрэчы і гутракі з цікавымі людзмі. Сёлета на другім паверсе РДК арганізаваны цудоўны дзіцячы пакой, дзе малыя могуць гуляць у сухім басейне, збіраць канструктар і складаць пазлы, маляваць разам з мастаком. Традыцыйна, праходзяць прадстаўленні лялечнага тэатра “Батлейка”. У арганізацыях і ўстановах ажыццяўляюцца праекты “Пераадоленне”, “Жывое слова”, “Педагогіка і праваслаўе” і іншыя.
Падчас адкрыцця фестывалю, у чацвер, 21 студзеня, прысутных вітаў начальнік аддзела ідэалагічнай работы, культуры і па справах моладзі райвыканкама Андрэй Карпук. Ён выказаў задавальненне ад таго, што надышоўшы год, які ў Беларусі аб’яўлены Годам культуры, на Кіраўшчыне пачынаецца фестывалем праваслаўнай культуры, і спадзяванні, што мерыпремствы “Кладзезя” парадуюць кіраўчан і ўмацуюць іх дух.
Вітаў гасцей выставы-кірмашу настаяцель Пакроўскага храма іерэй Дзімітрый Первій: “Асноўнае значэнне фестывалю — магчымасць сутыкнення са светам Праваслаўя. Асаблівую важнасць ён нясе для тых, хто пакуль яшчэ не жыве царкоўным жыццём. На выставе-кірмашы і царкоўным, і нецаркоўным людзям можна знайсці шмат карысных, патрэбных тавараў, якія, што важна, выраблены з малітвай, а гэта аказвае на нас асаблівы ўплыў. Зыходзячы з вопыту папярэдніх гадоў, запэўніваю, што кожны дзень работы фестывалю “Кладзезь” напоўнены асаблівым духоўным святлом, удзельнікі гэтай падзеі, безумоўна, яго адчуваюць”.
Затым быў адслужаны малебен на пачатак добрай справы перад іконай Іаана Шанхайскага і Сан-Францыскага з часткай яго святых мошчаў.
Падчас фестывалю малебны аб здравіі будуць праходзіць на другім паверсе Дома культуры ў 13.00 гадзін: у суботу, 23 студзеня; нядзелю, 24 студзеня; сераду, 27 студзеня; пятніцу, 29 студзеня; суботу, 30 студзеня; нядзелю, 31 студзеня.
Яўгенія БЯЛЬКО.
Фота Людмілы СЯМЁНАВАЙ.